Thli leh ruah avanga chhiat tawk tam

Thli leh ruah nasa taka thawk chuan hmarchhak hmun hrang hrangah chhiatna a thlen nasa hle.

Assam-ah bik chuan January 9 - April 30 chhung khan thli leh ruah baka ṭek tla avangin mi 21 ten nunna an chan bakah khaw hrang hrang 1,041-a mihring 39,595 chuang zet chuan an tuar a ni.

Assam State Disaster Management Authority (ASDMA) tarlan dan chuan chenna in 30,388 zet a ti chhia a, heng zinga 7,100 zet chu luah zui tlak lohin a awm mek a ni. Sorkar building, school leh sum dawnna hmun tam tak a tichhe bawk a ni. Cachar district chu a tuarna ber zingah hian telin, chhungkaw 17,666 zet chuan harsatna an tawk a, nunna chan an awm nual bawk. Cachar bakah hian Tinsukia district-ah pawh chhungkaw 11,251 zet chu a nghawng buai hle a ni.

April 28-a thli ruah leh ṭek tla khan Darrang, Kamrup, Barpeta, Sivasagar, Nalbari, Kokrajhar, Cachar, Tinsukia leh Goalpara te a nuai a, mi parukin nunna an chan bakah, hliam tam tak an awm bawk. Thliin a chhem tluk thing te chuan chennain a delh chhe nual mi tam tak chuan himna zawngin an in leh lo an chhuahsan a ni.