Manipur : Kuki-Zomi-Hmar hmeichhiate'n inthlanpui boycott dawn

Prime minister Narendra Modi chuan tunhnai mai khan Manipur buainain ziaawm lam a pan nia a sawi hnu ah, Inrinni liam ta khan Kangpokpi-ah inkahna thlengin Kuki-Zo village-volunteer pahnih kah hlum an ni a, an ruang chu rawng taka sawisak zui a nih avangin Kuki-Zo hnamte an lungawi lo hle.

Kuki-Zomi-Hmar hmeichhiate chuan Lok Sabha inthlan boycott an tum thu an sawi. Kuki-Zomi-Hmar women’s forums-a an hotu pakhat, Kim Gangte chuan thil thleng an duh lohzia entir nan inthlan boycott an tum thu ziakin Chief Election Commissioner of India, Rajiv Kumar hnenah a thlen. An lehkhaah chuan Kuki-Zomi-hmar hmeichhiate chuan India danpui hnuaia dikna chanvo an neih angin, inthlan lo awm tur chu boycott an tum thu an ziak a, thutlukna siam harsa tak ni mah se, sorkar laipui leh state sorkarah rinna an nghah ngam tawh loh vanga boycott tum an nih thu an tarlang tel bawk.

Kangpokpi-a inkahna thlenga mi pahnih thite ruang rapthlak taka sawisak a nih avang hian Manipur tribal-te chu an lungawi lo hle a, Committee on Tribal Unity (CoTU) in Kangpokpi district-ah darkar 24 awh bandh huaihawt tawhin, Kuki Students’ Organisation (KSO) chuan Churachandpur-a 'Wall of Remembrance' bulah nunna chân pahnihte tawrhpui nan hun an hmang bawk ang.

Jantar Mantar, Delhi-ah KSO leh Kuki-Zo hmeichhiate'n Pathianni zing aṭang khan lungawi lohna an lantir tawh a, hnam chi hrang tamna Manipur anga rorel tura Biren Singh a tlak lohzia leh, sorkar ralthuamte Meitei tana an pek zat pe ve tura an tihelna thuziakte kengin Jantar Mantar-ah hian an kal a ni.

KSO hian Prime Minister, Home Minister, President leh Leader of the Opposition-te hnenah memorandum theh lutin, Inrinni khan Arambai Tenggol, Imphal phairuama Meitiei helpawlte leh Manipur Police-te ṭangrual chuan Kuki khaw pakhat an beih thu an ziak a, Kuki-Zo volunteer pahnihin an nunna chânin rawng taka an ruang sawisak zui a nih thu an sawi bawk. KSO chuan Amit Shah chuan Manipur a tlawh a hun tawh hle tih sawiin, Kuki-te hnenah ziakin an buaina chinfel tiam tura an duh thu an sawi lang tel bawk.