Priyanka Gandhi-i'n Assam leh Tripura a tlawh dawn

Lok Sabha inthlan atan vote thlak hun a hnai zel a, Congress hruaitu hlun leh Rahul Gandhi farnu ni bawk, Priyanka Gandhi Vadra chu inthlanpui atana campaign turin vawiin hian Assam leh Tripura a tlawh dawn.

Priyanka Gandhi hian Assam-a a cham chhungin April 19- a vote thlak tur, Jorhat Lok Sabha biala Congress candidate Gaurav Gogoi a campaign-pui dawn a, campaign-na kawng khat atan Titabor-a roadshow neih turah tel tura ruahman a ni bawk. Hemi hnu hian Tripura lam a pan leh nghal ang.

Ruahman dan chuan vawiin vek hian Priyanka chuan Agartala, Tripura-a roadshow neih tura tel tura ngaih a ni a, INDI Alliance anga Tripura West leh Tripura East biala an candidate-te a campaign-pui dawn a ni. Agartala roadshow neih turah hian khaw chhung fan kual a ni anga, Priyanka chu Surya Chowmuhani hmunah thusawi tura ruat a ni. West Tripura bialah hian Tripura Congress president Asish Kumar Saha a ding dawn a, East Tripura bialah CPI (M) MLA hlui Rajendra Reang a ding dawn thung.

Congress MLA, Sudip Roy Barman chuan inthlanpui lo awm tur chu a pawimawh thu sawiin, mipuite chu roadshow an neih turah a tam thei ang ber tel turin a sawm a, mipuite chu India hma lam hun thlak danglam theitu an nih thu a sawi. Tripura-ah hian April 19 leh April 26-ah vote thlak a ni ang.