Manipur ṭhen hrang loa buaina chinfel kan tum : Amit Shah

Union home minister Amit Shah chuan Thawhṭanni khan Hapta Kangjeibung, Imphal East-a election rally neihnaah thu sawiin sorkar laipui chuan Manipur ṭhen hrang loa remna leh muana neihna kawng an zawn thu a sawi. Shah hi Manipur bakah Tripura-a election rally neihnaah a tel bawk.

Shah hian kumina Manipur a tlawh vawi khatna niin, inthlanpui lo awm tur chu BJP leh Congress inbeihna mai ni loin Manipur state inpumkhatna tihchhiat tumtu leh inpumkhatna vawnhim tumtute inbeihna a nih tel thu a sawi. Home Minister chuan hmarchhak leh Manipur chu India ram pum hma hun thlak danglam theitu a nih thu a sawi bawk. Dan phal loha Manipur-a lut ru ṭhin chungchang chu sawi lang bawkin, Manipur CM ngenna angin state chhungah Inner Line Permit (ILP) hman a nih thu a tarlang.

Amit Shah chuan Basanta Singh, Inner Manipur bial leh Kachui Timothy Zimik, Outer Manipur biala BJP candidate-te chu vote turin mipui a sawm. Rally-ah hian mi tam tak pung khawm mah se, Imphal hmun hrang hrang, a bikin Checkon leh Lamlong-ah lungawi loh lantirna thawm a ring hle thung. Mipui lungawi lote chuan rally neihna hmun panna kawngte dangin motor ke an hal bawk a, an lungawi loh thute an au chhuahpui a ni.

SC-in tlanchhiate vote thlakna hmun siamsak dilna a hnawl

Supreme Court chuan Thawhṭanni vek khan Manipur state chhung buai avanga an in leh lo tlansan a, hmun danga awm mekte vote thlakna hmun siamsak tura petition theh luh chu pawm loin a hnawl. SC hian inthlanpui lo awm tur tibuai thei thil a nih vanga hnawl a nih thu a tarlang.

Manipur-ah hian tualchhung buaina avanga in leh lo tlansan, state chhung hmun danga awm mek mi 18,000 chuang an tling nia chhut a ni. Heng mite hian India danpui hnuaia an dikna chanvo pakhat, vote an thlak ve theih nana special polling booth siamsak an ngiat a, Manipur-a inthlanpui awm turah hian heng mite hian vote thlak an chak ve hle niin petition-ah hian an ziak lang.

Chief Justice of India DY Chandrachud, justice pahnih; JB Pardiwala leh Manoj Misra-te chuan dilna lut hi ngaihtuahin, hun tepter tawh taka hetiang ngenna hi pawm harsa an tih thu an sawi. SC chu inrawlhin, petition anga special polling booth siamtir turin thupek chhuah ta se inthlan buaipuitute'n harsatna an tawk dawn niin an tarlang. CJI Chandrachud ṭhut bench chuan,"In rawn kal tlai hret a ni, tun dinhmunah chuan tih theih a vang tawh hle, tih theih kan nei tawh lo" an ti. Manipur-ah hian inthlanpui hi thawh hniha neih a ni dawn a, April 19 leh April 26-ahte vote thlak a ni ang.