Assam Rifles-in Tinsukia-ah beih an tawk

Assam Rifles patrol team phurtu lirthei chu nimin zing karah khan Tinsukia district, Assam-ah mi tu tih hriat lohte'n an bei. Sipai lirthei hi Changlang aṭanga Margherita pan tur niin, Namdang huam chhungah beih an tawk a ni.

Tinsukia district Superintendent of Police, Abhijit Gurav chuan Assam Rifles-te beih a nih thu hi sawi chiang tawhin, police pawh inkahna hmunah tirh an nih tawh thu a sawi. SP Gurav chuan hnu chhui hna kalpui ṭan chauh a nih avangin thil thlen dan sawi chian a la harsat thu leh, tun dinhmunah chuan eng helpawl tih nge an la hriat loh thu a sawi lang bawk.

Police-te chuan helpawlin India ramchhung awlsam taka an luh theih thu sawiin, China leh Myanmar ramri depa awm, Arunachal Pradesh chu dan phal loh thil tihna hmuna an hman bakah India ram luh nan helpawlte hian an hman ṭhin thu an tarlang. China leh Myanmar ramri kalpawh harsa tak tak lai chu helpawl hian remchangah hmangin, India rama luh ruk nan an hman ṭhin thu an sawi. Hei vang hian Police leh Assam Rifles hian Tinsukia leh a chhehvelah joint operation an nei mek a ni.

Nimin vek khan United Liberation Front of Asom-Independent (ULFA-I) chuan Assam Rifles beitu an nih thu an sawi. ULFA-I hian email hmanga thuchhuah an siamah Assam Rifles lirthei beitute an nih ngei thu tarlangin, sipai mi leh sa ṭhahnem takin hliam an tuar niin an sawi a, lirthei pawh an tihchhiat nual thu an sawi a ni. ULFA-I thuchhuah hian sipai hliam tuarte chu enkawl turin helicopter hmanga phurh an nih thu an tarlang tel bawk a ni.

Assam Rifles lirthei hi pathum niin pakhat chu hmunhim lamah a insaseng hman nia tarlan a ni. ULFA-I hian sipai beih nan hian grenade leh rocket an hmang niin report ṭhenkhat chuan an tarlang a, police leh sipai ṭangrual chuan joint operation nei ve nghalin nimin chawhnu thleng khan an la inkap nia tarlan a ni.