Assam leh Tripura-ah Priyanka Gandhi-in lawm a hlawh

Congress party hruaitu Priyanka Gandhi chuan Thawhlehni khan Assam leh Tripura tlawhin hun a hmang a, mipui lawm a hlawh hle. Gandhi hian Assam-ah Jorhat biala ding tur Gaurav Gogoi campaign-puiin Tripura-ah Ashish Kumar Saha, Tripura West biala ding tur a campaign-pui bawk a ni.

Priyanka hi Assam-a roadshow neihah telin, km 2 lai kawng an zawh chu Titabor Tiniali-ah a tawpna an siam a ni. Jorhat district, Assam-a thu a sawinaah Priyanka Gandhi chuan INDI Alliance an sorkar a nih chuan thingpui huana hnathawkte hlawh tihpun a nih tur thu a sawi a, heng mite hian BJP sorkar hnuaiah ngaihsak an hlawh ngai lo, a ti. BJP chuan sorkar laipuiah ro an rel leh a nih chuan India danpui siam ṭhat an tum niin a sawi a, an thiltum an tipuitling a nih chuan mi nawlpuiin dikna chanvo an neihte chu laksakin a awm dawn niin a sawi bawk.

Congress hruaitu hian prime minister Narendra Modi chu bei zuiin, hnathawh tur hmu lo tam takte chu ngaihsak loah a puh a, hemi chungchang hi PM Modi chuan sawi ṭha duh loin vawi hnih vel chiah a la sawi chhuak a ni, a ti. BJP chu hmarchhak state-a hnam hrang hrangte danglamna hmu thiam loah a puh bawk. Priyanka chuan vote an thlak hmain mipuite chuan sakhuana leh hnam behchhana vote thlak loin, thil man sang zel avanga an buaina chu rilruah dah zawk turin a chah.

Tripura lamah pawh Priyanka hian lawm a hlawh hle a, Tripura West bial chhunga roadshow neihah mipui tam tak hmaah thu sawiin Congress chuan thlei bik nei zawngin ro an rel dawn lo, a ti. Sorkarna an siam a nih chuan hmalak an tum dan hrang hrang tarlangin heng zingah hian hna nuai 30 siam belh, loneitute tan minimum support price (MSP) ṭha zawk ruahmansak, hmeichhiate tan kum tin Rs nuai 1 subsidy dawn theihna, ram nei lote ram pek bakah zirlaite tan pawl 12 thleng a thlawna an zirna tur siamsak te a tel thu a sawi.