Manipur-a oil phur luttu motor-te'n beih an tawk

Manipur ni tin mamawh pakhat, oil leh LPG phurtu lirtheite chu national highway 37-ah beih an ni. Lirtheite hi Kamai, Tamenglong district huam chhungah ralthuam kengte'n an lo kap a ni.

Tuialhthei phur lirthei beih tawk hi pathum niin, a khalhtu pakhat chuan hliam a tuar a, lirthei pawh kah chhiat niin an thil phurhte chu kawngpuiah a baw nasa hle. Hetiang thil a thlen hnu hian rang takin a hmunah venghimtute tirh luh nghal an ni.

All Manipur Petroleum Products Transporters Association (AMPPTA) leh All Manipur Petroleum Products Drivers Association (AMPPDA) chuan oil phurtu lirthei beitute chu an dem tak zet tih sawiin, national highway-ah venhimna khauh lehzuala kalpui turin Manipur sorkar chu an ngen nghal a, him taka lirthei khalhtute'n an tum ram an thlen theih nan anmahni venghim tura zuitu an mamawh tih an sawi bawk.

He thil thleng avang hian petrol leh diesel a van mai hlauh avangin Imphal phairuama chengte an chiai hle a, petrol pump-ah intlar an tam avangin Directorate of Consumer Affairs, Food & Public Distribution chuan thuchhuah siamin mipuite chu petrol an mamawh tawk chauh la turin an chah. Consumer Affairs chuan petrol leh a kaihhnawih lam chi chu an tlachham dawn lo tih tarlangin, petrol pump-te pawh a ngai anga inhawng turin an hriattir bawk a ni.