Arunachal : Helpawl-in NPP candidate thlawp turin mipui hriattir

Assembly inthlan hmachhawn tura inpuahchah mek, Arunachal Pradesh-ah National Socialist Council of Nagaland (NSCN) helpawl ni ngeia hriatte chuan Longding Pumao assembly biala ding tur, National People’s Party (NPP) candidate, Thangwang Wangham thlawp turin mipui an hriattir.

Longding Pumao bial hi Arunachal chhunga helpawl chettlat tamna hmun pakhat niin mipuite chu NPP candidate vote tur hian NSCN-KYA chuan hriattirna an tichhuak. He biala helpawl thupek zawm lote chungah hmalak a ni ang tiin NSCN-KYA hian an vaukhan bawk a ni. Longding Pumao biala khaw hrang hrang Niuasa, Longkhaw, Mintong leh Longphong-ahte NSCN-KYA hotute chetla hmuh ṭhin niin NPP candidate vote turin mipuite chu silai hmangin an vau ṭhin a ni.

NSCN-KYA hian mipuite chauh ni loin BJP worker leh hotute pawh an vau tel ṭhin nia sawi a ni. Helpawl hian BJP mi leh sate chu NPP candidate thlawp turin an hriattir a, an thupek zawm lo an awm a nih chuan an tuar dawn niin an sawi bawk.