Meghalaya-ah UCC hman ve kan duh lo : NPP

Bharatiya Janata Party (BJP)-in inthlanpui neih turah sorkarna an chang a nih chuan an tih tur pakhat zinga an telh, ram puma Uniform Civil Code (UCC) hman chu National People’s Party (NPP) chuan an duh lo tih an sawi.

NPP state president, Prestone Tynsong chuan UCC hman chungchanga an party dinna chu a la ngai reng tih a sawi nawn leh a, kum 2018 aṭanga tun thlengin an dodal tih sawiin budget session hnuhnung berah pawh UCC chungchanga an party dinna chu chiang taka sawi lan a ni, a ti. Tynsong chuan Citizenship Amendment Bill (CAB) chu an party leh tlawmngai pawl hrang hrangte'n an dodal avangin dan (Act) a nih hnuah Meghalaya chhunga hmun tam zawk chu CAA hian a huam loh phah niin a sawi bawk.

NPP candidate Ampareen Lyngdoh chu MP atana thlan tlin a nih chuan Meghalaya state-in neih chaka an dil reng, Inner Line Permit (ILP) chu an hmuh vat theih a rin thu a sawi a, hemi bakah hian Khasi leh Garo ṭawng, 8th Schedule-a telh turin hma kan la dawn a ni, a ti.

Voice of Peoples' Party (VPP) chuan North-East Democratic Alliance-a BJP nena thawk dun NPP chu rin har an tih thu an tarlang ve thung. NPP chu manifesto hrang siam loin BJP manifesto ṭawmpuiah VPP chuan an puh a ni. VPP hotupa Ardent Miller Basaiawmoit chuan mipuite chu fimkhur tura chahin, BJP manifesto chu Meghalaya leilung fate tan a him lo niin a sawi.