May 19-ah Assam election result

Assam state election result chu May 19-ah chhiar a ni dawn a, party hrang hrangte chuan sorkarna siam an inrin thu an sawi hlawm. Assam-ah hian 1985 aṭang khan state election neih ṭan a ni a, kumin inthlan kha boruak a san ber ṭum niin chik mite chuan an sawi.

Assam state election neih zawh takah khan Asom Gana Parishad (AGP) - Bodoland People’s Front (BPF) - Bharatiya Janata Party (BJP) alliance, Cong-ress leh All India United Democratic Front (AIUDF) te chu nasa takin an inbei a ni. Party hrang hrang te hian candidate lawk tak tak an theh chhuak hlawm a, chak tur pawh hriatthiam a har hle. Sorkar laipuia party hruaitu lawk te pawhin Assam election hi an ngaihven hle a, a hmunah kal chilhin party tan nasa takin an campaign a nih.

Election Commission chuan election April 4 leh April 11-a neih zawh tak result chu May 19-ah chhiar tur a nih thu a puang. Inthlan hi thawh hniha neih a ni a, a thawh khatnaah khan Constituency 65-ah neih niiin, April 11 khan a thawh hnihna hi constituency 61-ah neih leh a ni. Buaina lian tham leh thihna thleng awm lo mah se hmun hmun hrang hrangah buaina tenau sawi tur a awm nual a, hmun ṭhenkhatah chuan voting machine thlak ngai a awm nual bawk. Hel pawl ṭhenkhatin buaina siam an tum thu election hma hian sawi mah se, venhimna tha tak hnuaiah inthlan hi zawh fel a ni.

Ṭum dang zawng aiin social media hmanga campaign a nasa a, party hrang hrang zingah BJP chu a hmang uar ber an ni. Social media hmangin thu tam tak theh darh a ni a, heng zingah hian mimal leh party anga inbeihna a hluar hle. Ṭangkai taka hmang an awm laiin, Facebook leh Twitter hmangin thu belhchian dawl lo leh rin tlak loh tam tak tihdarh a ni bawk. Software professional Ashok Saikia chuan state election neih tawh te aiin kumin election-ah khan politician te chuan an hman nasat thu a sawi.

March 27 khan Rangapara-ah vantlang inkhawm buatsaih a ni a, kha huna thusawitu Prime Minister Narendra Modi chuan, “ Assam Chief Minister Tarun Gogoi hian kum 15 zet ro an rel chhung hian hmasawnna hmuh tur a thlen lo a ni" a ti. Hemi ni vek hian Titabor-a vantlang inkhawm-ah Assam Chief Minister chuan,“Prime Minister Modi hi lemcham thiam tak a ni, Oscar Award dawng thei zingah pawh a tel a ni" a ti ve bawk. Party lian pahnih te na taka an inbeih lai hian AGP chuan hamṭahatna tam tak an nei niin an insawi ve bawk.

BJP chuan 2014 Lok Sabha inthlan-ah an chet ṭhat avangin, kumin election-ah pawh hian hnehna chan an inbeisei hle a, seat 84 aia tlem lo lak an inring a ni. Kum 15 zet Congress-in sorkarna an siam tawh vangin mipuite chuan sorkar thar an duh niin an sawi a, sorkar laipui-ah rorel lai an nih bawk avangin mi tam tak chuan Congress paihthla theitu niah an ngai ve bawk.

Hetih lai hian Congress party chuan sorkarna rei zawk chang tura hnehna chan leh ngei an rinthu an sawi ve mek bawk. State hmangaihtu tak tak an nih thu sawiin, chu chu mipuite ngaihdan pawh niin an sawi. Senior journalist pakhat chuan Congress party chu Lok Sabha an chet ṭhat tawk lohna aṭanga insiam ṭhain sorkarna chang leh thei tura rinkai an nih thu a sawi a ni. Candidate ṭha tak tak leh mithar duhawmn tak tak an neih avangin mipuite chuan Congress-ah hian rinna an nghat niin Congress hruaitu Rajib Ahmed chuan a sawi ve bawk.

AIUDF leh BPF lam chuan party mala sorkarna siam inbeisei lo mah se, party mala sorkarna siam thei an awm loh chuan sorkarna siamtu zingah tel an tum thu an sawi. AIUDF hruaitu leh Lok Sabha MP Badruddin Ajmal chuan Congress party chu sorkarna siampui an hreh lo niin a sawi. Tunah hiamn AIUDF hian MLA 18 an nei mek a ni.

Prafulla Kumar Mahanta chuan AGP-BJP-BPF ṭangrual ten seat an lak zat tur chu sawi har mah se sorkarna siam ngei an inrin thu a sawi a, a bikin AGP candidate te chu an chet ṭhat a rin thu a sawi bawk. Kumar Mahanta hian an thawhhona chungchang sawiin, an party seat 24 chiah pek an ni chu mak a tih thu a sawi thar leh a, sorkarna ṭum hnih zet chang tawh an nih avangin mipuite-ah an la tla na tawk niin a sawi. AGP leh BJP te hian sorkarna siam turin an dinhmun a ṭhat thu a sawi bawk. Northeasttoday-in a kawmna-ah Prafulla Kumar Mahanta chuan Regional Party an zuih tial tial nia sawi chu chhangin, a dik loh thu a sawi a, an party chu ṭhalai tam takin an zawm mek a ni, a ti.

BJP Chief Ministerial candidate Sarban-anda Sonowal chuan sorkarna an siam a nih chuan eirukna do chu an thupui tur a nih thu sawiin, sorkar ṭha tak din chu mipuite laka an bat a ni,a ti. Congress kaihruai sorkar chu eirukna laka fihlim lo leh hmasawnna daltu a ni tiin, sorkar scheme hrang hrang te pawh a nih tur anga kalpui lo niin a tarlang bawk. Sarbananda Sonowal cfhuan an party tum ber pakhat chu Congress leh AIUDF paih thlak a nih thu a sawi a, Congress sorkar chu dan loa ramdang mi an state-a khawi ngamtu niin a sawi bawk. Sarbananda Sonowal hian an party hruaitu lawk Modi chu fakin India Prime Minister hmarchhak hmasawnna ngaipawimawhtu a ni a ti a, hmarchhak hmasawnna chuan Modi a tilawm hle niin a sawi. Sorkarna an siam a nih chuan scheme hrang hrang te chu a nihna tur ang taka kalpui an nih tur thu sawiin, chu chu hmarchhak hmasawnna atan a thil pawimawh ber pawh a ni, a ti. Ramri chungchang sawi chhuakin, ramri chu ven ṭhat a ngaih thu sawiin, dan loa Bangladesh atanga lut ṭhin te chu tihtawp thuai a ṭul a ni a ti. Ramri buai chungchang chu sorkarna an siam a, chief minister a nih chuan an ngaih pawimawh tur te zinga mi a nih thu a sawi bawk.