Tribal zirlaiten Manipur Uni-versity-ah lungawilohna lantir

Manipur University-a Tribal students’ union te chu Thawhlehni khan Tribal tana seat reservation 7.5%-a tih hniam sak an nih avanga lungawiloin Campus main gate an khar. Main gate hi a hnu lawkah security te chuan an hawng leh nghal a, police te buaina chhuak thei veng turin an duty nghal a, buaina siam man an awm lo.

Manipur University Tribal Students’ Union (MUTSU) te hian Tribal zirlaite tana admission reservation 31% aṭanga 7.5%-a tih hniam sak an ni chu hriatthiam har an tih thu an sawi. MUTSU president M. Joute chuan, "University chu seat reservation a tih hniam sut leh turin kan phut a ni" a ti. Thawhlehni zing khan Tribal zirlai eng emaw zat chu University thil tihdana lungawi lo hian Campus chhungah kawng an zawh a, a hnuah main gate chu an khar zui a ni. Mahse harsatna leh buaina lian tham thleng loin boruak chu a dai zui ve leh a ni.

Union spokesperson chuan policy thar chu siam ṭhat a nih hma lo chuan kalpui phawt a nih tur thu sawiin, University thuneituten an ngaihtuah dawn a ni, a ti. April 4 khan Deans Committee neih a ni a, committee chuan Tribal seat reservatuon tihniam tur hian ruahmanna a siam a ni. Hemi duh lo hian MUTSU te chuan April 30 leh May 1 khan lungawilohna an lo lantir tawh a, University thuneitute chu admission reservation policy siam ṭha leh tur hian an phut a ni. Union spokesperson chuan thuneitute lam aṭanga siamṭhat tumna a awm rih lo niin a sawi a, kaltlangpui a ni ta a ni a ti. Nimin khan Tribal zirlai te hian Campus chhungah hian lungawilohna an lantir leh bawk.