Tripura BJP MLA helten CM thlak an phut

Tripura-a rorellai, Bharatiya Janata Party (BJP) MLA zingah ṭhenkhat chu chief minister Biplab Kumar Deb lakah helin, CM thlak an phut chhunzawm zel. 

CM Deb chuan Thawhlehni khan media mite a kawmnaah, December 13 hian Agartala-a Vivekananda Maidan-ah mipuite chu kalkhawm tura ngenin, CM atana awm zui zel tura an duh leh duh loh zawh a tum tih a sawi. "Mipuiten duhdan angin ka awm dawn. CM tura min duh tawh lo a nih chuan party high command hnenah ka hriattir nghal dawn a ni," a ti. 

BJP Tripura in-charge atana ruat, Vinod Sonkar-a'n tun hnaia Tripura a tlawh khan, party worker ṭhenkhat chuan lungawi lohna lantirin, CM ban tura an phutna hi an lo aukhum a ni. 

Sonkar chuan CM nen hian BJP national party president JP Nadda pawh an biak thu sawiin, Biplab Kumar Deb chu Tripura CM atana dah chhunzawm zel a nih tur thu leh, party chhunga buaina a awm a nih pawhin an party hotu sang lamin an buaipui tur thu a sawi. 

Kumin October 13 khan BJP MLA lungawi lote hian JP  Nadda hi hmuin, CM thlak an duh thu hi an lo sawipui tawh a ni. 

Member 30 awmna Tripura Legislative Assembly-ah hian BJP hian MLA 36 neiin, ṭangrual sorkar a siampui Indigenous People's Front of Tripura (IPFT) chuan MLA pariat a nei.