Arunachal CM-in Rural Development Minister hmu

Arunachal Pradesh Chief Minister, Kalikho Pul leh Union Minister of State for Home Affairs Kiren Rijiju te chuan Union Rural development Minister Birender Singh chu Arunachal Pradesh-a Pradhan Mantri Gram Sadak Yojana (PMGSY) kalpui dan chungchangah meeting an neihpui.

Kalikho Pul chuan an state-a Pradhan Mantri Gram Sadak Yojana (PMGSY) kalpui mek chu 50% zawh fel a ni tawh thu a sawi. PMGSY hi sorkar laipui scheme lian tak pakhat niin, a bikin thingtlang leh hmun kilkhawr zawk te motor kawngpuiin a thlen ve theih nana hmalakna a ni.

Arunachal Pradesh chu hmun kilkhawr leh tlang ram a nih vangin kawngpui siam hna hi chak taka kalpui a harsat thu tarlan a ni. PMGSY sum hmang hian Arunachal Pradesh-ah hian kawngpui eng emaw zat laih hna thawh mek a ni a, Siang, Subansiri, Kameng, Lohit leh Dibang-ah te lei dawh mek a ni bawk.

Chief Minister, Kalikho Pul chuan RD minister hnenah harsatna an tawh te a thlen bakah Indo-China border-a motor kawngpui km 50 zet siam mek zawh thuai a nih theih nana hmalakpui turin Union Minister hi a ngen bawk. Singh chuan state sorkar chu theih tawp chhuaha bei zel tura a fuih bakah, harsatna an neih te sutkian a nih theih nana ṭanpui a hreh loh thu a hrilh a ni. Kalikho Pul chuan minister hnenah hian hmun kilkawr leh tlangram chhengchhe zualah te chuan hmun dang aiin kawngpui siam nan sum senso a san thu sawiin, state dang te nena tehkhin lo turin a ngen bawk a ni.