Assam-in power Megawatt 1202.2 thar chhuak

Assam state chuan power lama an indaih lohna sukiang mekin, tunah hian power plant pariat aṭangin power Megawatt 1202.2 a pe chhuak mek.

Union Minister of State for Power, Piyush Goyal chuan Lok Sabha-ah zawhna chhangin, tunah hian Assam chuan power plant pariat Ranganadi Hydro Power Project (406 MW), coal-based Bongaigaon Thermal Power Project (250 MW), natural gas-based Kathalguri Power Project (291 MW), Kopili Hydro Power Project (225 MW), multi-fuel Chandrapur Power Project (60 MW), gas-based Lakwa Gas Turbine (157.2 MW), Namrup Project (116 MW) leh Karbi Langpi Hydro Power Project (100 MW) aṭang tein power Megawatt 1202.2 a siam chhuak mek tih a sawi.

Bongaigaon Thermal Power Project megawtt 250 pe chhuak thei tur chu tunah hian kalpui mek a ni tih swaiin, minister chuan project hi April 2017-a zawh fel hman tur a ruahman a nih thu a sawi. Hei bakah hian power megawatt 70 pe chhuak thei tur Namrup Gas Turbine chu kalpui mek a ni a ti a, Septrember 2011-a zawh fel hman tura tih chu tunthleng hawn a la ni lo, kumin Septrember-ah hian hawn tuma hmalak mek a ni tih Goyual chuan a sawi bawk.

Union Minister of State for Power, Piyush Goyal chuan tunah hian power megawatt 2000 pe chhuak thei tur Subansiri (Lower) Hydro Power Project chu kalpui mek a nih thu House a hrilh a, kum 2020-2021 chhunga zawh fel hman tum a ni, a ti.

Central Electricity Authority tarlan dan chuan tunah hian hmarchhak state pariat te power siamchhuah zat chu Megawatt 58,356 a ni. Arunachal Pradesh chuan Megawatt 50,064 lawih siamchhuakin, a sang ber a ni a, Meghalaya Megawatt 2,298 leh Manipur Megawatt 1,761 te chuan an dawt a ni. Hetih lai hian Assam chuan Megawatt 650 chauh a siam chhuak nia tarlan a ni thung.