Sorkar laipuiin Arunachal-ah Sainik School din remti

Sorkar laipui chuan Arunachal Pradesh-a Sainik School pahnih din a remti a, Sainik School bakah hian recruitment centre din a ni dawn bawk.

Defence Minister Manohar Parrikar chuan recruitment centre din tura Chief Minister, Kalikho Pul rawtna chu pawm a ni, a ti. Chief Minister, Kalikho Pul hian Chief of Army Staff General Dalbir Singh hmuin, an state-a sainik school din tur hian a ngen a ni. Sainik School te hi Tezu leh Shergaon-ah te din tura ruahman a ni. Union Minister-in a pawmpui tak recruitment centre hi Tawang leh Tezu-ah te din a ni dawn a ni. Kalikho Pul chuan Sainik school leh recruitment centre din a nih hnuah chuan ṭhalai tam zawk ram venhimna lamah an lut thei dawn a ni a ti a, ṭangkai taka hman a nih tur thu a sawi.

Union Minister pawhin MoA chu ennawn a nih tur thu sawiin, Advanced Landing Ground (ALG) chu ṭangkai zawka hman a nih theih nan hmalak a ni ang a ti bawk. Arunachal chief minister hian sorkar mi pawimawh hrang hrang te kawm kualin an state harrsatna te a sawipui a ni. Pul hian thuneitute hnenah hian inkalpawhna kawnga harsatna an tawh te, ramri chungchang te a sawipui a ni.