UKNA-in tuialhthei phurtu lirthei beitu an nih thu puang

United Kuki National Army (UKNA) chuan Manipur pawhtu, National Highway-37 a oil leh gas phurtu lirthei beitute an nih thu an puang. Thawhlehnia Imphal leh Silchar inkalpawhna kawnga lirtheite beih an ni hi Manipur chief minister, N Biren Singh chuan a dem thu a lo sawi tawh a ni.

UKNA defence secretary chuan Tamenglon district-a Tollen khaw bula NH-37-a inbeihna hi an pawl tih a nih thu puangin Meitei tana ni tin mamawh leh ralthuam phur lut ṭhinte laka an chet lakna hmasa ber a nih thu a sawi bawk. Lirthei khalhtu pakhatin hliam a tawk chu pawi an tih thu sawiin, Imphal-a bungraw phurh lut ṭhinte chu NH-37 zawh tawh lo turin thuchhuah an siam nghal bawk a ni. Thawhlehnia inbeihna hi a tawpna a nih loh thu an sawi a, an thu chhuah zawm lote chu Kuki hmelma anga ngaih an nih tur thu leh, thu an awih loh man an hmu ngei dawn tiin an vaukhan bawk.

Hetih lai hian NH-37-a inbeihna thleng hi Kuki Inpi Jiribam, Tamenglong, and Noney (KIJTN) leh Kuki Chief Association, Tousem block (KCA) chuan an dem thu an sawi a, boruak ṭha leh ralmuang a awm theihna tura theihtawp an chhuah zel tur thu leh, boruak tichhe zawnga che lo tur leh fimkhur turin an ngen a ni.

Manipur tualchung buaina hian thla 11 a awh tawh a, hemi hun chhung hian Kuki-te beihna tur ralthuam lak luh nan NH-37 hi hman ṭhin a nih avangin UKNA hian he kawnga kal lirtheite hi bei an nih thu an tarlang. Manipur sorkar chu Kuki hnam laka tawrhna thlentirtu a nih thu an tarlang tel bawk.

Manipur chief minister N Biren Singh chuan NH-37 a lirthei beitute chu a dem thu sawiin, an hnu chhui hna ṭan a nih tawh thu a sawi a ni. Manipur chhunga pawl hrang hrang chuan hetiang thil hi thleng nawn tawh lo se an duh thu an sawi lang ve bawk.