Meghalaya : Bangladesh-a dan phal loha chini thawn vangin complaint theh lut

Meghalaya aṭanga Bangladesh lama chini thawn thlak ṭhin chu dan phal baka kalpui ṭhin a nih thu tarlangin, social activist Nilberth Ch Marak chuan Election Commission of India hnenah complaint a theh lut.

Meghalaya aṭanga chini thawn chhuah tam zawk chu Garo Hills district-a thleng niin, sorkar hriatpuina mumal nei loa kalpui a ni ṭhin. Thawhlehni khan chini phurtu lirthei pahnih chuan Joshipara, South Garo Hills-a lei (bridge) pawimawh tak chu zawh chimin hemi avang hian Bangladesh lama chini thawn chhuah ṭhin hian ngaihven a hlawh thar phah hle a ni.

Nilberth Ch Marak chuan Bangladesh lama chini thawn chhuah ṭhin hi Supreme Court thupek bakah Model Code of Conduct bawhchhiatna a nih thu a tarlang. Nilberth hian North, West leh South Garo Hills districts-a sorkar thuneitu lian tak tak Deputy Commissioner leh Superintendent of Police-te chu inhnamhnawihna neiah a puh bawk. Heng mite bakah hian Gasupara, South Garo Hills-a custom official-te chuan mawh an phur tel bawk niin a tarlang.

Nilberth chuan hemi hmaa complaint a theh luh vangin North Garo Hills SP chu thlak ni tawh mah se chini phurtu lirthei rit tak takte chu endik an la ni chuang lo tiin a complaint tharah chuan a tarlang. Heng lirtheite hian zalen takin an thiltih chu an kalpui chhunzawm reng a, Joshipara lei pawhin a tuar phah ta a ni, a ti. Lei chim avang hian helai hnaia chengte bakah state sorkar pawhin a tuar tih sawiin, veivah kawngah harsatna an tawh thu tarlan a ni bawk.