Assam-ah AITC hotu Mamata Banerjee

All India Trinamool Congress (AITC) leader leh West Bengal chief minister, Mamata Banerjee chuan Nilaini khan Assam tlawhin, Karimganj biala an party candidate Radheshyam Biswas tan a campaign.

Mamata hian Town Club khelmual, Silchar-ah thu sawiin,"INDIA ṭangrual pawlin sorkarna kan siam a nih chuan NRC leh CAA hi kaltlangpui a ni lo ang. Tun inthlan tluka eirukna hluarna inthlan hi kan la tawng ngai lo" a ti. AITC manifesto-ah hian Assam tana dan huatthlala tak, Citizenship Amendment Act (CAA) chu paih a nih tur thu a inziak a ni. Prime minister Narendra Modi kaihhruai sorkar chu bei zuiin India chu tan inah an chantir niin a sawi a, thuneihna an chan zel theih nan mipuite ṭhenhran pawi ti loah a puh bawk.

West Bengal chief minister hian sorkar laipui chu zalen takin sawisel theih an nih tawh loh thu sawiin, sorkar do zawnga ṭawng chhuakte chu tan ina khung an nih zel thu a sawi bawk. Mamata-i'n Assam a tlawh ni hian PM Modi chu Lok Sabha inthlanpui lo awm turah an party tan campaign in a thawk chhuak ve bawk a ni.

AITC hotu hian tun inthlan chu a pawimawh hle tih a sawi a, tun ṭumah hian kan ram, mipui sorkar leh zalenna humhim tumin inthlan kan hmachhawn dawn a ni, a ti. AITC hian Assam-ah hian candidate pali an neih tur thu March thla khan puangin, INDI Alliance ṭangrual pawla tel ni mah se, Assam-ah hian bial pathumah AITC leh Congress hian candidate an nei ve ve dawn a ni.