Nagaland-ah ASF hri kai hmuh a ni

Vawk hri chi khat, African Swine Fever (ASF) hri kai vawk chu Nagaland-ah hmuh a ni. Kohima Deputy Commissioner chuan an district huam chhung hmun ṭhenkhatah ASF hri kai vawk an awm nual thu a puang.

Kohima DC chuan thuchhuah siamin, ASF kai vawk awmna hmunte chu hri a darh zel loh nan khuahkhirhna hnuaia dah rih turin a hriattir. Khuahkhirh hmunte hi infected zone leh surveillance zone-a ṭhenhran niin, hri kai awmna hmun (infected zone) hian km 1 bial a huam a, Kidima khua chu infected zone-ah puan a ni. Infected zone tawpna aṭanga km 9 bial chin chu surveillance zone a ni ve thung. ASF kai hmuh thar leh a nih avang hian vawk talh, vawk lak luh leh thawn chhuah chu khap zui nghal a ni.

African Swine Fever (ASF) hi vawk tana hri inkaichhawn awl tak a ni a, he hri vang hian vawk thi tam tawh hlein a hri kai dam chhuak hi an tam lo hle. He natna kai vawk chuan khawsik sang tak neiin an chauh bakah an chaw eite an thlah ṭhin.