Lok Sabha inthlanpui 2024 : Hmarchhak state hrang hrangah vote thlak a ni

Lok Sabha inthlanpui thawh khatna chu nimin khan hmarchhak state hrang hrangah neih niin vote tlate hi June 4-ah chhiar a ni ang. State tam zawkah chuan inthlan thawh khatnaah hian vote thlak zawhfel ni mah se, Assam, Manipur leh Tripura-ah chuan bial ṭhenkhatah chauh inthlan hi neih niin, nidangah bial dang tan vote thlak a ni leh dawn thung.

Arunachal leh Sikkim

Arunachal Pradesh leh Sikkim-ah chuan Lok Sabha inthlanpui leh state assembly inthlan neih kawp a ni. Arunachal-a assembly bial 60 leh Sikkim assembly bial 32 atan vote thlak chu nimin khan zawh fel a ni a, June 2-ah vote tla chhiar a ni ang. Hemi rual hian Arunachal Lok Sabha bial pahnih atan leh Sikkim bial pakhat atan vote thlak nghal a ni bawk. Lok Sabha puala vote tla erawh India hmun dang rualin June 4-ah chhiar a ni thung ang.

Manipur

Chi leh chi inkara buaina chhuak avanga state ralmuang lo tak, Manipur pawhin nimin khan a thawh khat nan 18th Lok Sabha atan vote an thlak. Lok Sabha bial hnih awmnaah hian Inner leh Outer Manipur tan vote thlak ve ve niin, heng bial pahniha assembly constituency zatve velah vote thlak a ni a, inthlan hi thawh hniha neih tur a nih avangin constituency la bangte chuan April 26-ah vote an thlak ve leh ang. Inthlan chuhtu mi 10 awmin chung zinga paruk chu Inner Manipur biala ding an ni a, a bak mi pali chu Outer Manipur aṭanga inthlan chuh an ni.

Kangpokpi district-ah chuan an hnam chunga tawrhna nasa tak thleng avangin Kuki hnamte chuan vote thlak lo turin thu an titlu a, district chhunga polling station-te chu a ruak hle. Kangpokpi district chhunga hnam dangte chuan vote thlak mah se, Kuki hnamte'n vote an thlak ve loh avangin vote a tla ṭha lo hle a ni. Kuki Inpi Sadar Hills chuan thuchhuah siamin khaw hrang hranga Lal-te leh Kuki-Zo hnamte chu vote thlak lo turin a chah a, an thutlukna chu Committee on Tribal Unity leh Kuki pawl dang chuan an thlawp thu an tarlang bawk.

Imphal East-a Khongman polling station-ah chuan mi pakhatin mi dang tam tak tan vote a thlak tih mipuite'n an hriat hnuah mipui lungawi lote chu pung khawmin Khongman Zone 4-a Electronic Voting Machine (EVM) leh Voter Verifiable Paper Audit Trail (VVPAT) khawlte an tichhia a, hetianga midang aiawha vote thlak hi candidate pakhatin a hlawkpui thu an sawi. Inthlan hi a ralmuang lo hle tih Thamanpokpi, Moirang-a vote thlakna bula silai hmeh puah chuan a tichiang a ni.

Assam

Hmarchhak state zinga Lok Sabha seat ngah ber, Assam-ah pawh vote thlak thawh khatna nimin khan neih a ni. Lok Sabha bial 14 awmna Assam-ah hian Upper Assam lama bial panga - Dibrugarh, Jorhat, Lakhimpur, Sonitpur leh Kaziranga bialah inthlanpui atan vote thlak a ni. Heng bial pangaah hian candidate langsar tak tak an awm nual a, chungte chu union minister Sarbananda Sonowal (BJP), Gaurav Gogoi (Congress) leh Pradan Baruah (BJP)-te an ni. Assam-ah hian inthlanpui hi thawh thuma neih a ni dawn a, nimin kha a thawh khatna niin April 26 leh May 7-ah thawh hnihna leh thawh thumna atan vote thlak leh a ni ang.

Meghalaya

Shillong leh Tura Lok Sabha bial atana inthlan chu nimin khan neih a ni. Meghalaya Lok sabha bial pahnihah hian nimin khan inthlan hi zawhfel nghal a ni bawk. 2019 inthlanpuiah khan Tura bialah National People's Party (NPP) candidate chu thlan tlin niin Shillong bialah erawh Indian National Congress (INC)-in hnehna an chang thung. Meghalaya-ah hian voter nuai 22.17 an awm a, Inner Line permit hman leh 8th schedule-a Khasi leh Garo ṭawng dah tura nawrna a lian hle a, hemi tihlawhtling thei tura ngaih party-te dinhmun a ṭha hlein a lang a ni.

Tripura

Hmarchhak hmun dang rualin West Tripura Parliamentary constituency-ah an aiawh tur thlanna hun neih a ni. Vote hi zing dar 7 aṭanga thlak ṭan niin polling station ṭhenkhatah EVM chiang lo a awm avangin vote thlak ṭan hun tihkhawtlai a ni. West Tripura bialah hian voter nuai 14.61 an awm a, BJP candidate Biplab Kumar Deb leh INDI Alliance candidate Asish Kumar Saha chu hnehna chang tura rinkai berte an ni. Tripura-a Lok Sabha bial dang, East Tripura-ah chuan April 26-ah vote thlak a ni ve thung ang.

Nagaland

Lok Sabha seat khat awmna Nagaland-ah nimin khan inthlanpui atan hian vote thlak niin thawh khatah inthlan hi zawh fel nghal a ni. Zing dar 7 aṭanga vote thlak ṭan niin tlai dar 4 thleng polling station hawn a ni. Nagaland khawchhak lama chengte'n state hran, Frontier Nagaland Territory an ngiat avangin helai biala chengte chuan inthlan hi neih a nih loh nan bandh an puang a, vote a tla ṭha lo hle. Inthlan laia bandh puangtu leh Frontier Nagaland ngiat kawnga a meizanghlaptu ber, ENPO chu inthlan ni a bandh an huaihawt avanga insawi fiah turin Nagaland Chief Electoral Officer (CEO) a hriattir a ni.