Tripura : Thlipuiin chenna in 291 a tichhia

Tripura chuan Nilaini zan khan thlipui na tak tuarin, chenna in 291 chuang a chhia. State Emergency Operation Centre (SEOC) chuan Gomati district chu thlipui tleh tuar nasa ber an nih thu a tarlang.

Tripura district pariat zinga pali - Unakoti, Dhalai, West leh Gomati District-ah thlipui leh ṭek tla vang hian chhiatna a thleng a, heng district zingah hian Gomati chu a tuar na ber niin, chenna in 147 chu thlipui hian a tichhia a, chung zinga pahnih chu luah leh tur awm loin a len chhia.

India Meteorological Department (IMD), Agartala chuan inralring turin mipuite hnenah hriattirna a tichhuak a, thlipui darkar khata kilometre 40-50 a chakin a tleh theih thu leh ṭek tla nasa tak chu Tripura hmun ṭhenkhat in an tuar thei tiin thuchhuah an siam. Hemi bakah hian West, South leh Sepahijala district-ah ruah a sur nasa dawn niin IMD chuan a sawi lawk bawk.