Manipur : Polling station 11-ah vote thlak ṭhat a ni dawn
Manipur Chief Electoral Officer (CEO), Pradeep Kumar Jha chuan Inner Manipur biala polling station 11-ah vote thlak ṭhat a nih tur thu a puang. Heng polling station-ah hian April 22-ah vote thlak ṭhat leh a ni ang.
Election Commission of India (ECI) chuan Inrinni khan thupek tichhuakin, heng polling station-a April 19-a vote tlate chu pawm a nih loh tur thu an tarlang.
Lok Sabha inthlan thawh khatna neih zawh takah khan Manipur pawhin Inner leh Outer Lok Sabha bialah an aiawh tur thlanna hun nei ve mah se, hmun ṭhenkhatah inkahna a chhuah bakah buaina hrang hrang - inrikrapna, EVM tihchhiat leh mipui lamin polling booth thunun tumnate a thlen avangin inthlan hi a ralmuang lo hle a ni.
Congress party chuan polling booth thununna hmun leh EVM khawih chingpenna hmun nia an hriat polling station 47-ah inthlan ṭhat leh an duh thu an tarlang. Hemi chungchangah hian complaint theh lutin, Inner constituency-a polling station 36 leh Outer constituency-a polling station 11-ah inthlan ṭhat leh an duh thu Manipur CEO hnenah an thlen tih Manipur Congress president K Meghachandra chuan a sawi.
Polling station vote thlak ṭhat lehna turte chu Moirangkampu Sajeb leh Thongam Leikai (Khurai constituency), Kshetrigao-a polling station pali, Thongju Imphal East district-ah pakhat, Uripok a polling sation pathum leh Konthoujam Imphal West district-ah pakhat a ni ang.
AP-a polling station 4-ah inthlang ṭha dawn
Arunachal Pradesh chief electoral officer (CEO), Pawan Kumar Sain chuan Arunachal-a polling station paliah inthlan ṭhat leh a nih tur thu a puang. Heng polling station paliah hian EVM tihchhiat tum a nih avangin vote hi thlak ṭhat a ni ang.
Arunachal CEO chuan EVM tihchhiat leh ruk bo tumtute hi man an nih tawh thu sawiin an chungah dan anga hmalak chhunzawm a nih tur thu a sawi.
Vote thlak ṭhat lehna turte chu Kurung Kumey district a Langte Loth (Nyapin assembly constituency), Bogia-Siyum, Dingser leh Lengi (Nacho assembly constituency) Upper Subansiri district-te an ni.