AMSU in Assam-Meghalaya kawngpui dan an tum

All Assam Minority Students Union (AMSU) chuan East Garo Hills district-a Assam mi pathum tualthihna chu chhui chhuah ngei an duh tih tarlangin, heng mite thihnaa a mawhphurtu chhui chhuah emaw, mitthi chhungte zângnadawmna pek emaw an nih loh chuan Assam leh Meghalaya inkalpawhna kawngpui zawng zawng dan an tum tih an tarlang.

Assam mi pathum, Meghalaya-a tualthite hi Jomor Ali, Noor Mohammad leh Zahidul Islam-te niin, kar liam ta Thawhlehni khan Meghalaya-ah hian an zin a, a tuk Nilaini zing karah police-te chuan an lirthei ni ngeia hriat chu Wagachi huam chhung ramhnuaiah hmuin, lirthei bul maiah ruang pathum chu phum a lo ni. Rongjeng police station-ah thubuai ziah luh niin, hnu chhui hna hi kalpui mek a ni.

Heng mite tual thihna avanga lungawi lo hi an tam hle a, Goalpara District Minority Students' Union chuan kar liam ta Inrinni khan National Highway 217, Dudhnoi-ah lungawi lohna an lantir a, he hunah hian AMSU president, Rezaul Karim pawh a tel a ni. Lungawi lo pung khawmte chuan chhiat tawk chhungte'n zângnadawmna an hmu lo emaw, pawikhawihtute man an nih thuai loh chuan Assam leh Meghalaya inkalpawhna kawngpui zawng zawng khar a ni ang, an ti.