Meghalaya : HNLC-in state sorkar sawmna chhang lo

Meghalaya-a helpawl lian tak, Hynniewtrep National Liberation Council (HNLC) chuan remna leh muanna a awm theih nana Meghalaya sorkarin inbiakna nei tura a sawmna chu a chhang let lo. Meghalaya state chhung a ralmuan theih nana hmalak hian awmzia a neih loh mai a hlauhawm ta hle a ni.

State sorkar leh HNLC hian inbiakna vawi eng emaw zat an nei tawh a, mahse, inbiakna hnuhnung berah erawh HNLC hotupa a tel lo thung. Meghalaya sorkar chuan remna a awm theih nan ngawrh leh zualin helpawlte chu inbiakna nei turin a nawr a ni.

Sorkar hian inbiakna neih hi duh hle mah se, HNLC lam hian ngawih an chuh tlat a, Meghalaya sorkar sawmna pawh hi a chhang lo a ni. HNLC laka palai hna thawk mek, Sadon K. Blah chuan helpawl hnen aṭang hian inbiakna neih chungchangah thu engmah a dawng lo niin a sawi.

Meghalaya deputy chief minister, Prestone Tynsong chuan HNLC chu inngaihtuah ṭha turin a duh tih a sawi a, remna a awm theih nan dawhkan khat kilpuiah a sawm a ni. Tynsong chuan helpawl lam hian sawmna an ngai pawimawh lo a nih chuan danin an chunga ro a rel hun a la awm dawn tiin a vaukhan a ni.