BSF-in Indo-Bangla ramriah camera 503 dah tawh

Border Security Force (BSF) Tripura Frontier IG, Patel Pijush Purusottam Das chuan ramri kaltlanga thil tawlhruk leh dan phal loha chetna dang thleng ṭhin venna kawng khat atan, Indo-Bangla ramriah surveillance camera 503 hman theih turin an vuah fel tawh tih a sawi.

BSF Tripura Frontier Headquarters-a thuthar thehdarhtute a kawmnaah, Das chuan ramria sipai duty-te chuan rim taka hna an thawh thu sawiin, ramri a kua awm ṭhinte pawh a phui sawt hle a ni, a ti. Das chuan Tripura-ah kilometer 856-a thui hung hna chu kalpui mek a nih thu leh, he hna avang hian ramri hung hmaih avanga kua awm paruk chu hung ṭhat a ni tawh niin a sawi bawk.

BSF official-te chuan harsatna an tawh langsar ber chu a ruka mihring rawn lut an awm ṭhin chu a nih thu an sawi a, hetiang tih ching mi 1,018 chuang an man tawh thu an tarlang bawk. An mi man zinga 592 chu India ram rawn luh tum niin a dang zawng chu India ram chhuahsan tum an ni thung . An mi man zingah hian Rohingya raltlan an awm nual niin an sawi tel bawk.

National Investigation Agency (NIA) mi leh sate'n dan phal loha India ram rawn lutte lo pui ṭhintu, mi 29 an man tawh tih BSF chuan an tarlang. BSF chuan an thiamthil bakah an hmanraw neih hmangin NIA-te hi an pui ṭhin niin an sawi a, heng an mi mante hmang hian India rama rawn lut ṭhinte kalkawng chu an hriat theih phah a, chungte chu an hnawhphui phah thei niin an tarlang tel bawk. Surveillance camera hi uluk lehzuala ramri venhimna tur a ni a, ramria lut ru man chhuah nan leh dan phal loh thil ti ṭhinte chhui chhuah nan a ṭangkai hle dawn a ni.