Manipur : Inthlan ṭhat neihah vote a tla ṭha

Manipur chhunga Lok Sabha bial pakhat zawk, Inner Manipur Parliamentary constituency-a polling station 11-ah Thawhṭanni khan vote thlak ṭhat a ni. Venhimna uluk taka kalpui niin April 19 aiin vote a tla ṭha zawk. Inner Manipur bialah hian candidate paruk awmin; BJP, INC, RPI (A) leh independent candidate pathum an awm a ni.

Election Commission of India (ECI) chuan polling station 11-ah hian thil dik tawk lo hrang hrang - inkahna, inrikrapna, EVM tihchhiat leh mipuiin polling booth an thunun avangin inthlan ṭhat leh a nih tur thu hi a puang a ni. ECI chuan April 19-a vote tlate chu pawm an nih dawn loh thu a chhuah bawk.

Inner Manipur Parliamentary constituency-a polling station 11-ah hian zing dar 7 aṭanga tlai dar 5 thleng vote thlak hun hawn leh a ni a, tlai dar 5 thleng khan 86% vote tlain, hei hi April 19-a vote tla 72 % aiin a sang zawk a ni. Vote thlak ṭhatna hmunah hian venhimna pawh uluk lehzuala neih niin, inthlan tibuai zawng emaw tharum thawhna chhuak emaw a awm lo nia tarlan a ni.

Arunachal Pradesh-a assembly bial pali huam chhunga polling sation pariatah vawiin hian vote thlak ṭhat a ni ve bawk ang. Heng polling station-a Lok Sabha leh assembly inthlan atana vote lo tla tawhte chu pawm a ni dawn lo tih ECI chuan tarlangin, vawiin hian vote thlak ṭha leh turin ruahmanna a siam. Polling station pariatah hian zing dar 6 aṭanga tlai dar 2 thleng vote thlak hun hawn a ni ang.