Tripura : CPI (M)-in inthlan chungchanga dik lo awmte CEC-ah theh lut
Tripura Communist Party of India (Marxist) hruaitu hlun leh Leader of Opposition, Jitendra Chaudhury chuan Chief Election Commissioner, Rajiv Kumar hnenah West Tripura parliamentary constituency inthlana thil felhlel awmte ziakin a theh lut. Chaudhury hian INDI Alliance ṭangrual pawlin inthlan ṭhat leh an duh chhan Election Commission of India (ECI) hnena an hriattirna a ni tel tih a sawi bawk.
Chaudhury hian polling station pahniha thil dik lo awmte chu chiang taka tarlangin, 10-Majlishpur Assembly polling station-ah chuan voter 566 awm anga chhinchhiah ni mah se, vote 574 a tla tih an lehkhaah chuan a tarlang. Hemi bakah hian 5-Kayerpur Assembly-ah pawh voter 1,290 awm anga chhinchhiah ni mah se, vote 1,292 a tlak thu a tarlang bawk. Heng bial pahniha vote tlak dan hian vote thlak zawh taka thil felhlel awm chiang takin a tarlang a ni, Chaudhury chuan a ti.
Jitendra Chaudhury chuan,"Hetiang vote tla percent dik lo tak hi booth thununna hmun emaw, a huhoa intiamruala vote tla tihchingpen emaw a nihna hmunah lo chuan thleng thei a ni lo. Heng thil felhlel awmte hian Left party leh INDI Alliance-in vote thlak ṭha leh tura a ngenna hi thil pawmawm tak a nihzia a tichiang a, mipui chanvo humhim nan leh democracy zahawmna humhim nan vote thlak ṭha leh turin kan ngen a ni," tiin ECI hnena a lehkhathawnah chuan a ziak a ni.