US state department report-ah Manipur buaina chungchang tarlang

United States state department chuan kum tina a siam ṭhin, mimal dikna chanvo chungchang report tichhuakin Manipur buaina pawh tarlan tel a ni. Report hian Manipur buainaah hian intihduhdahna nasa tak a thleng ngei tih a tarlang.

US state department report hian nikum May aṭanga November thleng khan Manipur aṭangin raltlan mi 60,000 chuang an awm tih an tarlang a, chi leh chi inkara buaina avang hian mi 200 chuangin nunna an chân tawh tih a sawi lang bawk. Hemi bakah hian India ram chhung hmun hrang hrangah hnam tenau zawk leh journalist-te'n beihna an tawk ṭhin nia sawiin, ramchhung hmun hrang hrangah mimal dikna chanvo palzut ṭhin a nih avanga lungawi lohna thawm a lian hle tih an tarlang. Sorkar leh a thawhpui hrang hrangte'n thuthar thehdarhtute chunga an thuneihna hman sual a thleng zing hle a ni tih report hian a tarlang bawk.

Arambai Tengol-in Manipur humhim turin thutiam la thar

Meitei kalfawr pawl, Arambai Tengol chuan Manipur state humhim turin a tharin thutiam lakna hun an hmang. He hunah hian an pawl inthuam dan, kawr dum hain mi tam tak an kal khawm.

Khongjom War, Manipur-in zalênna suala indona a hmachhawn hnuhnung ber vawi 133-na pualin Arambai Tengol chuan thuthiam a thara lakna hun an hmang a ni. Arambai Tengol commander-in-chief, Korounganba Khuman chuan he hun hi a kaihruai a, Khuman chuan Lok Sabha inthlan neih zawh tak chungchangah an pawl chuan engmah sawi an duh rih lo tih a sawi. Hei hi polling booth hrang hranga buaina chhuak chu Arambai Tengol mi leh sa tih ni ngeia a lan vang a ni.

Kangpokpi-ah buaina a chhuak

Kangpokpi leh Imphal West district inrina bula awm, Phaileng khuaah inkahna tharlam a thleng a, ralthuam keng Meitei lam ni ngeia hriatte chuan Sekmai lui bula hnathawkte an bei.

Sekmai lui bula hnathawkte hian inkahna thlen hnu hian an hnathawhna hmun an tlansan a, hriat theih chinah thi leh hliam an awm lo nia tarlan a ni. Committee on Tribal Unity (CoTU), Sardar Hills chuan inkahna thleng chu an dem tak zet tih sawiin Media Cell Coordinator, Ng. Lun Kipgen chuan inbeihna thleng chu Meitei pawl lamin Lok Sabha inthlan thawh khatna neih zawh taka buaina awmah an inrawlh vanga an hming chhiatna thup nan Phaileng-Luwangsanggol khua chu an bei ta niin a sawi. Kipgen chuan sorkar laipui chu inrawlh thuai tura a duh thu a sawi bawk.

Kangpokpi district chhunga Saparmeina bula National Highway-2 ah nimin vek han IED pathum puak bawkin, kawngpui a tihchhiat avangin helai kawnga veivakte'n harsatna an tawh phah a ni. Nimin zing kar lama thil thleng hi tribal pawl lam chuan an dem thu tarlangin emergency meeting an ko nghal a ni. Bomb puak avang hian thi leh hliam an awm lo nia tarlan ni mah se, Imphal leh Dimapur inkal pawhna kawngpui erawh a chhiat phah a ni.