Meghalaya : Minister-in Civil Service exam-a inziak tling awm lo pawi a ti

Meghalaya education minister, Rakkam Sangma chuan UPSC buatsaih Civil Service Exam result chhuak hnuhnung berah an state aṭanga inziak tling an awm lo chu pawi a tih thu a sawi. Nikuma result chhuakah khan Shillong mi Swapnil Bhattacharya chu All India Rank (AIR) 344 niin tling mah se, tun hnaiah Meghalaya aṭang hian inziak tling an tam lo hle a ni.

Sangma chuan an state aṭanga tling an awm lo chu inenfiah nana an hman a ngaih thu sawiin sorkar, zirna in, zirtirtute leh zirlai naupangte chuan harh thar nan hmang se a duh thu a sawi. Sangma chuan state dang zirlaite aiin an state zirlaite chu an hniam bik lo tih chu a rindan nghet tak a nih thu a sawi bawk. Education minister hian an state hma lam hun atan Civil Service officer neih chu a pawimawh tak zet tih sawiin hetiang exam tumte chu ngawrh lehzuala bei turin a chah.

Rakkam Sangma chuan an zirna in ṭha vak lo leh curriculum chu hlawhtling an tlem chhan pakhat a ni thei tih a sawi a, hemi avang hian an state a zirlai naupangte chuan India ram hmun danga zirlaite ngaihtuah leh suangtuah ang an nei ve pha lo thei niin a sawi. Zirlaite'n india ram chhung mai ni lo, khawvel ram danga zirlaite ruala ke an pen ve theih nan state chhunga zirna inte chuan ṭan lak an mamawh tiin, UPSC - CS exam tuma inbuatsaihte tuaihriam nan hma an lak reng thu leh, khawi laiah nge midangte an phak loh tih chu a hriatthiam loh thu a sawi bawk.