CAA hmanga Chakma-te Assam-a sawn luh tum niin AJP hruaituin sawi

Assam Jatiya Parishad (AJP) leader leh Dibrugarh Lok Sabha candidate, Lurinjyoti Gogoi chuan tun hnaia union minister Kiren Rijiju thusawi chuan Chakma hnamte'n Citizenship Amendment Act hnuaiah Assam aṭangin khua leh tui nihna dil an tum tih a tichiang niin a sawi. Arunachal Pradesh sorkar chuan Chakma hnamte khua leh tui dilna an lo hnawl tawh a ni.

Gogoi chuan hnam tenau zawkte tan CAA chuan nghawng ṭha lo tak a nei a, tun Lok Sabha inthlanah pawh hian a lang chhuak niin a sawi. Gogoi chuan campaign-a an vah chhuahnaah pawh mipuite chuan CAA chungchang chu an bengkhawn hle niin a sawi a, Assam leilung fate tan a hlauhawm em tih chu mipuite chuan hriat an chak hle a ni, a ti. Assam mipuite chuan CAA chu pawm harsa an tih thu leh leilung fate hamṭhatna lak bosakna hmanrua a nih mai an hlauh thu Gogoi chuan a sawi bawk.

Assam Congress president Bhupen Borah chuan minister Himanta Biswa Sarma chu a ruka Hajong-Chakma hnam mi nuai 5 chuang Assam a inbenbeltir tumah a puh a, chu chu Amit Shah thupek niin Kiren Rijiju chuan tum loh deuhin a puang chhuak palh ta niin Borah chuan a sawi. Rijiju-a'n Arunachal-in CAA a ṭha zawngin an chhawr dawn tia a sawi pawh chu Borah chuan sawiselin, Arunachal chu ram dang aṭanga raltlan pawh pawm thei lo state an nih thu a sawi.

Assam chief minister Himanta Biswa Sarma chuan Chakma leh Hajong hnamte Assam lama sawn luh tumna a awm loh thu a sawi ve thung. Sorkar laipui leh Assam sorkar inkarah hetiang hawi zawnga inbiakna engmah a awm loh thu a sawi. Kiren Rijiju hian tun hnai mai khan a thusawinaah Chakma leh Hajong raltlante chu CAA hman a nih hunah Arunachal aṭangin Assam lama thawn thlak tum a nih thu a sawi.