Nagaland : Sumdawng pawlin lungawi loh lantir nan dawr khar dawn

Nagaland-a Dimapur Chamber of Commerce and Industry (DCCI) chuan sumdawngte laka chhiah khawn tam leh vau an tawh ṭhin avanga lungawi lohna lantir nan, vawiin hian Dimapur khawpuia dawrte chu an khar vek dawn. DCCI chuan loh theih lohna avanga inkhar an nih thu tarlangin mipuite leh tlawmngai pawl dangte chu anmahni thlawp turin an ngen.

DCCI thlawpna lantir nan Kohima Chamber of Commerce and Industry (KCCI) pawhin vawiin vek hian Kohima khawpuia dawrte an khar ve bawk ang. Hemi bakah hian district pathuma petrol filling station-te chuan DCCI thlawpna lantir nan vawiin aṭang hian filling station khar a nih tur thu an puang ve bawk.

Nagaland-a sumdawng pawlte hian Naga Political Groups (NPGs) te'n chhiah khawn an ti tam lutuk leh an pek theih loh chuan an vau ṭhin tih sawiin, nawrh hi an huaihawt a ni. DCCI hian vawiin aṭangin tiam chin awm loin khawpui chhunga dawr zawng zawng khar a nih tur thu an sawi a, KCCI pawhin vawiin vek hian darkar 12 awh turin nawrh hi an huaihawt ve bawk ang.

DCCI hian tihdan chi hrang hrang hmanga dawr neitute hnena pawisa khawn ṭhinah NPG chu an puh a, NPG chuan sumdawngte dawrah chuan dan phal loh thil dah ru ṭhinin chumi hnuah dawr neitute chu pawisa chawitir ṭhin an nih thu an tarlang. Hetianga an che lai thla lo la ṭhintu CCTV/DVR-te chu an chet dan thup nan hman theih lohin an hreng bawk ṭhin a ni, an ti. Hemi bakah hian sumdawng zingah NPG-te pawisa khawn pek duh loh avanga an kut tuar tam tak an awm tawh tih an sawi bawk.

Nagaland chhunga boruak a ralmuan loh avang hian sumdawng tam tak chuan Assam lam an pan tawh thu an tarlang a, Nagaland sorkar chu inrawlh tura an duh thu leh an dinhmun ṭha lo tak chu ngaihthah chi a nih tawh loh DCCI chuan an sawi.