Manipur : Pawl hrang hrangin bomb puak an dem

Manipur National Highway 2-a IED bomb pathum tihpuah chuan sawi zui a hlawh hle. NH-2 hi Imphal luhka pawimawh tak niin, Nilaini zingkara bomb puak avang hian lei (bridge) pawimawh tak chu tihchhiat a ni. Gamnom Saparmeina Police Station-ah hemi avang hian thubuai theh luh a ni tawh bawk.

NH-2 zawh tum lirthei ṭhahnem tak chu an tum ram an thlen hmain an tangkhang phah a, Hengbung khaw bulah chuan truck tam tak an ding mek. Lei (bridge) chhia avang hian LVM chin chauh kaltlang phalsak an ni. District Magistrate, Kangpokpi chuan lirthei, rit phurte chu helai kawng zawh lo tur hian thuchhuah a siam a ni.

Committee on Tribal Unity (CoTU), Sadar Hills chuan bomb hmanga vantlang thil pawimawh tihchhiat a ni chu an dem tak zet tih tarlangin, media cell coordinator, Ng. Lun Kipgen chuan he kawngpui hi Kuki hnam tan chauha bungraw lak luhna kawng pawimawh ni loin, Kangpokpi district chhunga hnam zawng zawngte tana kawng pawimawh a nih thu a tarlang.

Kuki Women Union Sadar Hills pawhin thuchhuah siamin bomb tipuaktute an dem thu leh dawizepthlak an tih thu sawiin, bomb puak hian naupang leh hmeichhiate chu a tihthlabar thu an tarlang bawk. Kuki Students' Organisation, Sadar Hills pawhin bomb puak demna thu an sawi lang ve bawk.

Coordinating Committee on Manipur Integrity (COCOMI) chuan NH-2 bomb hmanga beih a ni chu pawi an tih thu tarlangin, pawikhawihtute chu chhui chhuah ngei an phût tih an sawi. COCOMI chuan chhui chian hna chu National Investigation Agency (NIA) kuta hlan an duh tih an tarlang tel bawk. NH-2 kawngpui ringtu hi mi mtd 3.5 lai nia chhut niin Manipur tualchhung mite tan a pawimawh hle a, Southeast Asia ram kalpawhna kawng pawimawh tak a ni tel bawk.