Arunachal : Highway mîn avangin harsatna tawk

Arunachal Pradesh-a National Highway 313, Anini leh Roing inkalpawhna chu ruah sur nasa avangin a mîn a, helai kawng zawhtute hian an inkalpawhna kawng ber a mîn tak avangin harsatna lian an tawk mek a ni.

Dibang Valley district thuneitute chuan thuchhuah siamin, NH-313, Anini leh Roing inkar kawng chu ruah sur nasa avanga a mîn hnuah, siam ṭhat hna thawh nan a tlem berah ni thum an mamawh dawn niin an tarlang. Thuneitu lam chuan mipuite chu kawng siam hna zawhfel a nih hma chuan helai kawng zawh rih lo turin an chah bawk.

Arunachal-a NH-313 hi Indo-China ramri hnaiha awm niin, leimîn avang hian China ramri lam panna kawng chu a ping rih a ni. He kawng hi a pawimawh hle a, highway hmanga Dibang valley kalpawh theihna awm chhun a ni.