Assam Rifles beihnaa inhnamhnawih mi pathum man

Assam rifles convoy beihnaa inhnamhnawihna nei nia hriat vangin, United Liberation Front of Asom-Independent (ULFA-I) helpawl mi leh sa pathum chu man an ni. Assam Rifles convoy hi tun thla tir lam khan Tinsukia hmunah beih an ni.

Tinsukia police chuan thuchhuah siamin Changlang district, Arunachal-a cheng mi pathum chu Arunachal police, Tinsukia police leh Assam Rifles te chuan joint operation neiin an man tih an tarlang. An mi man pathumte hian ULFA (I)-in Assam Rifles convoy an beihna kawngah tha an thawh a, man tawk zinga pakhat chu helpawl bungraw mamawh a ngaihtuahsak ṭhin bakah ei tur a pe ṭhin a, convoy beihna tur hmuna ULFA (I) helpawl kawng kawhhmuhtu a ni bawk. A dang pahnihte hi helpawlte tlanchhiatna kawnga puitu niin, man chhuah an nih loh nan Tinsukia leh a chhehvela mite ULFA (I) lama an ṭan theih nana theihtawp an chhuah bawk.

Police chuan Assam Rifles-in helpawl an kah let hnuah helpawl mi pakhatin nunna a chan tih an hriat thu tarlangin, a bul hnai ramhnuaiah phum nghal a nih thu an sawi. Police-te chuan helpawl lam boral ta ruang hi an zawn dawn thu leh, a chhungte hnena ruang thlen ngei an tum tih an tarlang tel bawk. Inkahna thlengah hian midang pathum chuan hliam an tuar tih an hriat thar thu sawiin, Myanmar-a ULFA camp lamah enkawl tura thawn an ni tih police chuan an sawi.