Lok Sabha inthlan thawh hnihna hmarchhak state pathumah nei

Lok Sabha inthlan thawh hnihnaah hmarchhak state pathum - Assam, Tripura leh Manipur-ah an aiawh tur thlanna an nei ve leh. Heng state pathuma bial pasarihah vote thlak a ni.

Assam :

Lok Sabha bial 14 awmna Assam-ah hian inthlan thawh khatnaah khan bial panga chhungah inthlan zawh fel niin nimin khan bial dang pangaah vote thlak leh a ni. Bial panga inthlanna hmunte chu- Nagaon, Karimganj, Silchar, Diphu leh Darrang-Udalguri an ni. Diphu bial hi tribal tana bial hauh bik niin bial pangaah hian candidate 61 zet inthlan chuh hi an awm. Zing dar 7 aṭanga vote thlak ṭan niin tlai dar 5 thleng polling booth hawn a ni. Nimina inthlan thawh hnihna neih zawh a nih hnu hian Assam Lok Sabha bial 10-ah inthlan zawhfel niin bial 4 la bangte chu May 7-ah an inthlang ve leh ang.

Assam inthlanah hian polling booth hrang hranga Electronic Voting Machine (EVM) chian loh avangin vote thlak a tikhawtlai a, hemi bakah hian Mangaldoi-a polling station pakhatah Voter Verifiable Paper Audit Trail (VVPAT)-ah buaina tawkin vote thlak kawngah harsatna an tawk bawk.

Tripura :

Tripura East constituency chuan nimin khan inthlan hi an hmachhawn ve bawk a, he bial hi tribal tana bial hauh bik a ni. Lok Sabha bial pahnih awmna, Tripura-a bial pakhat zawk Tripura West-ah chuan inthlan thawh khatnaah khan vote thlak zawhfel a ni tawh.

Tripura East-ah hian TIPRA candidate, BJP-in an thlawp Kriti Singh Devbarma leh CPI-M candidate, INDI Alliance thlawp Rajendra Reang te chu inbei tawk hle tura rin a ni. Tihian Tripura chhunga Lok Sabha bial awmah inthlan zawhfel a ni ta a ni.

Manipur :

Hmarchhak state zinga inthlang tur thawm ngaihnawm ber, Manipur-ah pawh inthlan thawh hnihna neih rual hian Outer Manipur bialah vote thlak a ni ve bawk.

Inthlan thawh khatnaa buaina chhuak hrang hrang angte a thlen tawh loh nan venhimna pawh an uluk hle. Central paramilitary force company 87 leh State police 4,000 chu polling station 857-ah sem darh an ni. Inthlan thawh khatnaa vote la thlak ve lo, outer constituency-a assembly bial 13-ah vote hi thlak niin BJP-in a thlawp Kachui Timothy Zimik leh Congress candidate Alfred K Arthur-te chu Outer bial aiawha tling tura rin kai berte an ni.