Manipur : Governor-in Imphal-ah Food Museum of Northeast hawng

Manipur governor Anusuiya Uikey chuan Ningani khan hmarchhak state hrang hrang aṭanga eitur siam pho chhuahna tur, Food Museum of Northeast chu Central Agricultural University (CAU), Imphal-ah a hawng. Governor hian Liquid Bio-Fertiliser Production Unit pawh hman ṭan a nih theih nan a hawng nghal bawk.

Food Museum hi College campus chhunga awm niin, Agro-ecotourism Park hnuai peng pakhat zinga mi a ni. Hmarchhak state pasarih - Arunachal Pradesh, Manipur, Mizoram, Meghalaya, Nagaland, Sikkim leh Tripura aṭangin eitur chi hrang hrang pho chhuah nghal a ni bawk. Governor chuan thlai thartute chawikan nana CAU hnathawh chu ropui a tih thu sawiin, thlai thar leh a kaihhnawih eizawnnaah tihdan hrang hrang hmangin kuthnathawkte chawikan an tum ṭhinna chu ropui a tih thu a tarlang.

Governor chuan Liquid Bio-Fertiliser chungchang sawi lang bawkin, kuthnathawktute'n ṭangkai taka an hman a beisei tih a sawi. Uikey chuan Food Museum chuan hmarchhak state dang aṭangin khualzin tam zawk a hip ngei a beisei thu a sawi a, CAU vice chancellor, Dr. Anupam Mishra hmalakna chu chhuanawm a tih thu a sawi bawk.