Sikkim hi India ramchhung dik tak a ni : Sikkim CM

Sikkim chief minister, Prem Singh Tamang Golay chuan an state chu India ramchhung a nih thu sawiin, China chuan eng ang pawhin sawi mah se, India ram an nihna a bo dawn lo, a ti. Sikkim CM hian Himachal Pradesh a tlawh ṭumin he thu hi a sawi a ni.

China chuan Sikkim hi a ram chin nia ngaiin China map an siamah pawh an telh ṭhin a, India ram chinah an pawm ve thei lo a ni. Sikkim CM Golay chuan,"China ngaihdan a pawimawh lo, India ram zau tak huam chhunga mi kan ni. Ṭanchhan mumal nei loa an ram china min chhal ṭhinna hian belhchian a dawl lo tak zet a ni" a ti. CM chuan Himachal Pradesh a tlawh chhan chu sakhuana thil a nih thu sawiin, Buddhist sakhaw hotu, Dalai Lama malsawmna dawn tuma kal a ni tih a sawi.