Hmaarchhakah hripui lengin zia lam a pan thei lo

Hmarchhak bialah Covid-19 lengin ziaawm lam a la pan thei lo a, state hrang hrangah hri kai thar leh hri thihpui an la pun belh zel. 

Arunachal Pradesh-ah October 29  khan hri kai hmuh chhuah thar mi 108 an awm a, an zingah hian security force mi leh sa pathum bakah, healthcare worker pathum an tel. 

State chhunga hri kai hmuh chhuah tawh hi mi 14,580 an ni tawh a, an zinga 12,480 chu enkawl dam ni tawhin, recovery rate hi 85.59% a ni. Mi 36 in Covid-19 an thipui tawh thung. October thla chhungin hripui vanga thi hi mi 18 an awm a ni. 

State Surveillance Officer (SSO) Dr Lobsang Jampa chuan nimin thleng khan state pumah sample  3,12,775  endik a ni tawh tih a sawi. 

Hmarchhak state zinga  hri kai leh thihpui tamna ber Assam-ah chuan Ningani khan Covid-19 kai  hmuh chhuah thar 398 an awm leh a, hri kai hmuh chhuah tawh hi mi 2,05,635 an awm tawh a ni. 

Ningani vek khan Covid-19 vangin mi paruk an thih belh leh bawk a, Assam-a hripui vanga thi hi mi 923 an ni tawh. 

Hri kai hmuh chhuah, positivity rate hi 1.41% niin, thihpui fatality rate hi 0.45% a ni. Hri kai enkawl dam 1,93,571 an awm tawh a, recovery rate hi 94.13%  a ni.

Enkawl dam tawh zinga mi 1,767 chuan state chhung plasma bank panga awmah an plasma an donate a ni. 

Nimin thleng khan rapid antigen leh RT-PCR hmangin sample nuai 46.06 test a ni tawh a, Ningani  bik khan sample 28,302 an test a ni. 

Manipur-ah Ningani khan hri kai hmuh chhuah thar mi 242 awmin hemi ni vek hian Covid-19 vangin mi pali an thi bawk. 

State chhunga hripui vanga thi hi mi 160 an tling tawh a ni. 

Ningani vek khan enkawl mek zinga 163 chu hri an kai tawh loh avangin enkawlna hmun aṭangin chhuahtir an ni bawk. 

State pumah hri kai hmuh tawh hi mi 19,051 an ni tawh a, an zinga 13,583 chu enkawl dam an ni tawh a, hri kai mek 4,308 an la awm. State recovery rate hi 75.24% a ni. 

Meghalaya-ah October 29  khan Covid-19 vangin mi pahnih an thi a, hripui vanga thi hi mi 87 an awm tawh a ni. 

Director of Health Services (MI), DrAman War  chuan an state-a hripui vanga thi zinga 80% chu natna benvawn nei an ni tih a sawi. 

Ningani vek khan hri kai hmuh chhuah thar mi 77 awmin, enkawl dam mi 130 an awm bawk. Hri kai hmuh thar zingah hian Urban Affairs minister Sniwbhalang Dhar a tel. Dhar hi state minister zinga hri kai pathumna a ni a, a hmain health  minister Al Hek leh power minister James PK Sangma te chuan Covid-19 an kai tih hriat a lo ni tawh bawk. Sangma hi a dam tawh a, Hek chu inah a la inkhung hrang mek a ni. 

Meghalaya-a hri kai hmuh tawh chi mi 9,303 an ni tawh a, an zinga 7,890 chu enkawl dam an ni tawh. Ningani thleng khan swab sample 2,00,391 test a ni tawh. 

Nagaland-ah Ningani thleng khan hri kai hmuh chhuah mi 8,894 an awm tawh. 

Ningani khan hri kai hmuh chhuah thar mi 70 an awm a, an zinga mi 46 chu Dimapur ami niin, Kohima-ah mi 19, Mon-ah mi pathum, Longleng leh Zunheboto-ah mi pakhat ve ve an awm. 

Hri kai zinga  7,019 chu enkawl dam an ni tawh a, hetihlai hian mi 29 chuan hripui hi an thihpui tawh a ni. Hri kai enkawl mek mi 1,758 zingah mi pali chu an dinhmun a ṭha lo a, ventilator hmantir an ni. 

 Principal Secretary (Home) Abhijit Sinha chuan RT-PCR hmangin sample 61,242 endik a ni tawh a, heng zinga sample 60,194  result  hriat a ni tawh tih a sawi. TrueNat  hmangin sample 33,337 endik a ni tawh bawk. 

Sikkim-ah Ningani khan Covid-19 kai  hmuh chhuah thar mi 18 awmin, hri kai hmuh tawh hi 3,893 an awm tawh. 

Hri kai zinga 3,476 chu enkawl dam an ni tawh a, mi 67 in thihpui tawhin, mi 82 chu state danga inenkawl turin an kal a ni. 

East Sikkim chu hri kai hmuh tamna ber niin mi 2,890 hmuh chhuah a ni tawh a, South Sikkim-ah mi 719, West Sikkim-ah 179 leh North Sikkim-ah hri kai mi 23 hmuh an ni tawh. 

Ningani thleng khan Sikkim-ah hian sample 56,150 test a ni tawh a ni. 

October 29 khan Tripura-ah hri kai hmuh thar mi 160 an awm a, hemi ni vek hian enkawl dam mi 170 an awm bawk. 

State Covid-19 bulletin tarlan danin, an state-ah hri kai hmuh tawh hi mi 30,453 an ni tawh a, an zinga 28,332 chu enkawl dam ni tawhin damdawi-in aṭangin chhuahtir an ni tawh a, state recovery rate hi 93.66% a ni.  Covid-19 thihpui hi mi 342 an tling tawh. 

Covid-19 vanga thi mi 342 zinga mi 178 chu state khawpui, Agartala mi an ni. 

Nimin thleng khan state pumah sample 4,54,391 test a ni tawh a, posi­tivity rate hi 6.72% a ni.