Manipur : Polling booth parukah vote thlak ṭhat leh a ni ang

Election Commission of India (ECI) chuan thuchhuah siamin, Outer Manipur constituency-a polling booth parukah vawiin hian vote thlak ṭhat leh a nih tur thu a tarlang. Heng polling booth-ahte hian zing dar 7 aṭanga tlai dar 4 thleng vote thlak leh a ni ang.

Ukhrul, Chingai leh Kharong assembly huam chhunga awm polling booth parukah hian vote thlak lai tihbuai niin EVM tihchhiat a ni a, vote tlate chu hmuh let a harsat tawh avangin vote hi thlak ṭhat a ni dawn ta a ni. Social media lama video darhah chuan Ukhrul-a polling station ṭhenkhatah vote thlak tur vau an nih lai tihlan a ni a, hemi bakah hian hmun ṭhenkhata polling station chu suasam niin VVPAT chhuat laia thehdarhte hmuh tur a awm bawk.

Congress hruaitu Jairam Ramesh chuan BJP thlawp, Naga People’s Front candidate vote turin mipuite chu nawr luih an ni tih a sawi. Vote thlak ṭhat hi a vawi khatna a ni lo a, buaina leh mipuiin booth an thunun avangin inthlan thawh khatna zawh hnu khan Inner Manipur constituency-ah polling booth 11-ah vote thlak ṭhat a lo ni tawh bawk a ni.