Tripura : Sorkarin tui harsatna hmun 313-ah motor 135 hmangin tui a sem

Tripura sorkar hnuaia Department of Drinking Water and Sanitation (DWS) chuan an state chhunga tui harsat zualna hmun 313-ah motor 135 hmangin tui phurh luh ṭhin a ni tih an sawi. He thu hi state chhunga tui harsatna sutkian a nih theih nana meeting pawimawh tak neihah an tarlang.

Tripura sorkar chuan tunhnaia khaw lum nasa tak leh ruah tla a tlem avangin hmun tam tak, a bikin Tripura tlang ram lamah tui indaih lohna a awm tih an tarlang. State chhunga tui harsatna thleng mek sutkian dan tur sawiho nan Department of Drinking Water and Sanitation (DWS) chuan meeting pawimawh tak koin hmalak dan tur an rel a ni.

DWS meeting-ah hian chenna hmun, tui harsat zualna 313 chu chhinchhiah an nih thu tarlangin heng chenna hmunte'n tui hnianghnar zawka an neih theih nan tui phur motor 135 hmangin tui phurh luh ṭhin a nih thu an sawi a, tuna an hmalaknain tui indaih lohna a phuhruk zo lo a nih chuan tui phur motor tam zawk an la tirh luh belh theih reng niin an tarlang bawk. DWS secretary Abhishek Singh chuan tui harsat avanga buaina an tawh thu te, tui in tur hnianghnar taka an neih theih nan water supply project, Jal Jeevan Mission hnuaia an kalpui mekte chu ṭha taka chhunzawm a ṭul thu a sawi a ni.