SC-in Kuki helte thubuai Assam-a ngaihtuah turin a sawn

Supreme Court chuan Kuki Revolutionary Army (KRA) chief David Hangshing leh United Kuki Liberation Front (UKLF) hotupa, Lhunkhoson Haokip te ralthuam ruk thubuai ngaihtuahna tur chu Manipur aṭangin Assam-ah a sawn.

He thubuai hi kum 2018 a inṭan niin Manipur court-ah ngaihtuah turin a awm mek. Mahse Supreme Court chuan thubuai hi NIA special court, Guwahati-a ngaihtuah turin thu a titlu ta a ni. Justice Abhay S. Oka leh Justice Ujjal Bhuyan te ṭhut bench chuan he thutlukna hi an siam a ni.

SC hian kar liam ta Thawhṭanni khan he thubuai hi hmun danga ngaihtuah mai ṭha a tih avangin additional solicitor general, Vikramjeet Banerjee hnenah Manipur ni lo state dang, thubuai ngaihtuah a nihna hmun tura ṭha a tihna theh lut turin a lo hriattir tawh a, AGS hian Guwahati chu ṭha a tih thu SC hnenah hian a thlen a ni. SC chuan thubuai kaihhnawiha inhnamhnawihna nei zawng zawngte chu June 3-ah special court hmaah hian inlan turin thupek a chhuah bawk.

Manipur aṭanga Assam-a ngaihtuah tura sawn tak hi ralthuam ruk thubuai niin kum 2018-a thleng a ni. 2nd Manipur Rifles Battalion, Director General Pool Armory aṭangin pistol 56 leh magazines 58 ruk chhuah niin, heng ralthuamte hi helpawl hnena hralh chhawn leh nia hriat a ni. He thubuaia ralthuam ru chhuaktu nia puhte hi bail-a chhuah lailawk niin, an state chhungah buaina a nasat avangin Manipur pawn lama thubuai ngaihtuah turin ngenna an thlen a, pawm a ni ta a ni.