Nagaland : Sumdawngte'n dawr khar an titawp

Dimapur Chamber of Commerce & Industries (DCCI) chuan Thawhṭanni zan khan an lungawi lohna lantirna atana dawr an khar chu an titawp tih an puang. DCCI hian dawr kai zawng zawngte chu dan pangngaiin nimin aṭanga inhawng ṭan turin an chah nghal a ni.

Thawhṭanni khan Nagaland sorkar chuan DCCI leh Confederation of Nagaland Chamber of Commerce and Industry (CNCCI) chu dawr khar titawp turin a ngen a, sorkar chuan thuchhuah siamin pawl emaw mimal emaw anga dan pawna pawisa khawn leh tihluihna hmanga pawisa khawn ṭhinte chu sorkar chuan a thlawp ngai lo tih a tarlang. GST emaw dan hmanga pawisa khawn ṭhin chu state sorkara chhun luh tur a nih thu sawiin, sumdawngte pawh state sorkar hnenah chiah chhiah chhung lut turin a chah bawk.

Nagaland sorkar hian dan pela che ṭhin thil sual titu chu pawl emaw mimal emaw anga lo man ve ngawt chu dan phal loh an nih thu an tarlang bawk. Sumdawng hnena dan phal loha chhiah khawn ṭhinte lakah a ṭul anga hma la turin sorkar chuan police leh district hrang hranga thuneitute chu a chah a, mipuite chu an harsatna thuneitute laka thlen hreh lo turin a hriattir bawk. Sorkarin sumdawngte thlavang hauha thuchhuah a siam hnu hian DCCI chuan tiam chin awm loa dawr an khar chu an titawp ta a ni.