Amit Shah-a'n Guwahati-a kawng zawh a telpui

Lok Sabha inthlan atana campaign-na kawng khat atan Guwahati-ah kawng zawh huaihawt niin union home minister Amit Shah chuan a telpui. Kawng hi kilometre hnih zawh niin, Cycle Factory bul aṭanga inṭanin Lal Ganesh area thleng zawh a ni.

Amit Shah hi Assam chief minister Himanta Biswa Sarma leh Guwahati Lok Sabha constituency candidate Bijuli Kalita Medhi te'n an ṭawiawm a ni. BJP thupuangtu pakhat chuan mi nuai khat vel kawng zawhnaah hian an tel niin a sawi. Guwahati, Dhubri, Kokrajhar leh Barpeta bialah inthlan thawh thumna atan May 7 hian vote thlak a ni ang.

Union Home Minister hian Guwahati-ah thuthar thehdarhtute kawmin, eptu pawl lian ber Congress chu na takin a bei a, sakhuana hmanga reservation pek tumah a puh a, hei hi BJP chuan an duh lo hle tih a sawi. Congress chuan Muslim-te chu Other Backward Classes (OBC)-a dah an tum niin Shah chuan a sawi a, sakhuana hmanga reservation pek an tum chuan sakhaw hrang hrang zuitute inkarah inngeih lohna a chawk chhuak thei a ni, a ti. Congress chu thu dik lo thehdarh ṭhinah a puh bawk.

Shah chuan inthlanpui an hmachhawn mekah hnehna sang tak an chan a rin thu sawiin, BJP leh an thawhpuite chuan Lok Sabha seat 400 chung lam an la thei dawn niin a sawi. BJP chetṭhat ngai lohna hmun, South India lamah pawh tun inthlanpuiah chuan an dinhmun a ṭha hle niin a sawi. Shah chuan an sorkarna hnuaiah Scheduled Castes (SC), Scheduled Tribe (ST) leh Other Backward Classes (OBC) te humhimna dan chu a derthawn loh thu sawiin an tidanglam dawn lo tih a tarlang.