Manipur : CBI-in tribal hmeichhe pahnih police-in mipui kuta an pek thu sawi

Central Bureau of Investigation (CBI) chuan Manipur a Kuki-Zo hmeichhe pahnih, saruaka Meitei te'n kawng an zawhpui chhui chianna neiin charge sheet theh luh a ni tawh. He thil thleng hi nikum June thlaa an video a darh hnuah CBI hian an chhui zui a ni.

CBI charge sheet hi tunhnaia darh thar ni mah se, nikum October thlaa special judge hnena theh luh tawh kha a ni. Thil thlen dan chipchiar taka tarlan niin, Meitei mipuite chuan khaw pakhat beiin, in an hal bakah a chhunga chengte chu tharum hmangin an bei bawk nia tarlan a ni. Khaw mipuite hlaua tlanchhia chuan ramhnuai lam an pan a, an zinga hmeichhe pahnih chu um phain, Meitei pung khawmte hian saruakin khawlai an fan kualpui ta a ni.

Meitei-ho tlanchhiatsan tumte hi police motor an hmuhah an tlan lut a, hetah hian sipai bang nupui zawk chuan police-te chu hmunhim lama hruai turin a ngen a, mahse, police lam chuan motor chabi a awm loh thuin an chhang a, hmeichhe pahnih leh mipa pakhat chu an pui lo bawk niin tarlan a ni. CBI charge sheet hian police motor-a lo awm chuan chabi a nei lo nia a sawi chu dawt a nih thu an tarlang a, motor chhunga an chuan tawh hnu chuan Meitei pung khawm lam panin motor chuan a kalpui a ni, an ti.

Charge sheet-ah chuan Meitei pung khawmte chuan police motor chhunga chuang mipa pakhat leh hmeichhe pahnih chu pawt chhuakin an sawisak bakah saruakin hmeichhe pahnih chu kawng an zawhpui ta nia sawi a ni. Police motor khalhtu chuan a laka inhumhimna zawng, Kuki-Zo mite chu motor aṭanga Meitei lamin an pawh chhuah hnuah chulai hmun chu a chhuahsan zui ve nghal a ni.

CBI charge sheet theh luh hian hmeichhe pahnihte chu saruaka kawng zawhpui an nih hnuah hmeichhiat mipatna rawngkaiin tihnawmnah an tawk bawk tih a tarlang. Tribal khaw beitu Meitei lam hian silai changkang leh ṭha tak tak AK rifles, SLR, INSAS leh .303 rifles te an keng a ni. CBI hian puitling paruk leh kum tling lo pakhat chu a huhoa mi pawngsual, tualthah leh criminal conspiracy thubuai an siamsak a ni.