Manipur : Indian Army leh Meira Paibis innawr buai

Manipur Bishnupur district-ah Thawhlehni khan Meitei hmeichhe pawl, Meira Paibis leh central force-te an innawr buai. Sipai lam hian mipui hnawh darh nan van lam hawiin silai an hmeh puah phah hial.

Central sipai-te hian Thawhṭanni tlai khan Kumbi, Bishnupur district-ah Meitei Village Defense Force (VDF) 11 leh ralthuam ṭhahnem tak an man a,an ralthuam mante Kumbi Police Station lama dah an tum chu Meira Paibis lam hian an lo tibuai a, kawng an lo dang a ni.

Meira Paibis hian ralthuam an mante chu VDF kuta pe kir leh turin an ngen a, hemi bakah hian VDF mi 11 an mante pawh chhuah turin an ti bawk. Sipai lam hian VDF an mante chu chhuah an nih tawh thu sawiin, an ralthuamte erawh dan angin police station lamah thawn a ni dawn tih sawi mah se, Meira Paibis-te chu Kumbi Police Station-ah pung khawmin rathuam pek chhuah hi an phût a ni.