Arunachal zirlai pawlin Chakma chungchang sawihona an dodal

Rajiv Gandhi University (RGU)-a Department of Political Science-in Thawhlehnia Chakma chungchang sawihona an buatsaih chu All-Arunachal Pradesh Students Union (AAPSU) chuan an dodal.

Chakma chungchang sawihona tur atan hian,‘The Chakma issue in Arunachal Pradesh: Search for a democratic solution,’ tih chu thupuia hman niin, hei hi AAPSU chuan an duh loh thu an sawi. AAPSU general secretary Ritum Tali chuan naupang zawkte rilru hruai kawi thei thil eng pawh dan zel an tum thu sawiin, AAPSU pawmpuina an nei hmasa lo a nih chuan Chakma leh Hajong chungchang sawihona neih an remti lo tih a sawi a, hma lam hunah pawh hetiang sawihona hi mimal emaw pawl emaw anga huaihawt an remti lo tih a sawi bawk.

Thawhlehnia sawihona neihah hian Arunachal-a Chakma-te chungchang sawi niin social activist, Jarjum Ete chuan hetiang sawihona buatsaih hian Chakma leh Hajong buaina chungchangah rah ṭha a chhuah ngei a beisei thu leh, hun reitak aṭanga buaina an neih tawh chu chinfel a ngai tawh niin a sawi.