Meghalaya : Jaintia National Council-in BSF check post ṭhenkhat tihtawp an ngen

Jaintia National Council (JNC) chuan Meghalaya deputy chief minister, Prestone Tynsong hnenah lehkha theh lutin, Sonapyrdi, Umbluh leh Dona hmuna Border Security Force (BSF) check post-te tihtawp an duh thu an sawi.

JNC chuan heng lai hmuna check post-te chu mipui tana harsatna siamtu a nih bakah ramri venhim kawngah a ṭangkai tawk lo niin an sawi. Hemi bakah hian BSF-te chu mipui tana hnawksak zawnga khawsa ṭhinah an puh bawk. BSF chuan ramria buaina thleng ṭhin an dan theih loh thu JNC hotupa chuan sawiin ruihhlo tawlhruk leh mihring lut ru dan kawngah pawh BSF chu an hlawhchham a ni, an ti.

JNC chuan BSF-in mipui an tihduhdah ṭhin dan leh ramria buaina chhuaka an ṭangkai lohzia chu thil thleng hrang hrangin a tihchian thu sawiin, Meghalaya sorkar chu BSF-te dah bo tura hma la turin an ngen.