ITLF-in Manipur buaina chhuah champhaah bandh huaihawt dawn

Manipur-a nikuma tualchhung buaina thleng chu vawiin hi a kum khatna a ni dawn a, Kuki-Zomi te tawrhna hriat reng nan buaina inṭan ni hian Indigenous Tribal Leaders Forum (ITLF) chuan bandh an huaihawt dawn.

ITLF chuan Kuki-Zomi hnamte chu an inpumkhatzia lantir nan leh, he ni hriatreng nan hian in tinah flag dum zar turin an ngen a, sumdawng leh dawrkai bakah zirna in leh bazarte chu khar turin an hriattir bawk. Zing kar aṭangin bandh hi nei ṭanin vawiin nileng a awh ang. ITLF chuan Kuki-Zo mipuite chu hma lam hun eng zawk an neih theih nan ṭanrualpuiah an sawm a ni.

All Manipur Christian Organisation (AMCO) chuan vawiin vek hian ṭawngṭai rualna hun an hmang ve bawk dawn. AMCO chuan buaina nena inchiahpiah reng Manipur-a remna leh muanna a awm theih nana ṭawngṭai rualna hun hi Tangkhul Baptist Church, Dewlahland, Imphal-ah an hmang dawn a ni. Rev. Simon Raomai, AMCO president chuan nikum May 3 aṭanga buai ṭan, Manipur chhunga buaina a reh thei lo chu pawi a tih thu a sawi. AMCO chuan buaina chhuah hnuah Biak In 369 zet tihchhiat a nih tawh thu sawiin hemi bakah hian temple eng emaw zat tihchhiat a ni tawh niin an tarlang bawk.