Meghalaya : Shillong-ah venhimna khauh lehzualin kalpui

Meghalaya khawpui Shillong-ah ṭum thum lai sorkar hmunhma leh lirthei beih an nih avangin, Meghalaya sorkar chuan department hotu zawng zawng hnenah an pisa leh lirtheite chu him taka dah turin hriattirna a tichhuak. Shillong leh district headquaters-ahte venhimna khauh lehzual zawka kalpui a ni bawk.

Sorkar pisa leh lirthei beitute hi hriat an la ni lo a, police station pahnih; Sadar leh Rynjah police station chu Nilaini khan petrol bomb hmanga beih niin hemi bakah hian Meghalaya Government Construction Corporation (MGCC) hmunhma ṭhenkhat chu hal a ni bawk. Hemi bakah hian thla hmasa khan Mawlai police station chu petrol bomb hmang thoa beih niin police lirthei pakhat tihchhiat a ni.

East Khasi Hills district deputy commissioner, SC Sadhu chuan vehimna khauh lehzuala kalpui a ngai tih sawiin, a bikin zan lamah venhimna uluk a ngai hle a ni, a ti. District superintendent of police nen pawh hemi chungchang hi an sawi dun tawh a, tun dinhmuna dan leh hrai kenkawh chungchanga buaina an tawh hmachhawn dan turah ruahmanna siam turin SP chu a chah tih a sawi bawk.

Sadhu chuan pawikhawihtute hriat chhuah tumin an beih mek thu leh, man chhuah ngei an tum thu a sawi. Sorkar department zawng zawngte chu an lirthei leh office thilte hmun him taka dah a, pawn lama dah lo turin an hriattir a ni. Heng hmalakna hian rah ṭha a chhuah ngei a beisei thu Sadhu chuan a sawi.

Meghalaya state-ah hian tun hnaiah pawikhawihna thleng a tam hle a, ram leilung fa ni lote chungah tual thihna a thleng zeuh zeuh reng a ni. CAA duh lohna lantirna kawng zawh, Ichamati khuaa neih a nih ṭumin mi pahnih thah an ni a, hemi bakah hian state dang aṭanga inhlawh tura Meghalaya pan mi pathum chu Mawroh-ah beih niin pakhat a thih phah a ni. Assam aṭanga mi pathum Meghalaya pante pawh an lirthei nena an bo hnuah ramhnuaiah an ruang phum hmuh a ni bawk. Heng pawikhawihna zawng zawng hi tu tih nge hriat a ni lo.

Hei bakah hian thla hmasa aṭang khan state chhungah petrol bomb hmanga pisa beih leh pisa hal tumna ṭum sarih lai a thleng tawh a, hetianga sorkar hmunhma beih zingah hian sokar pisa, police station leh Meghalaya deputy chief minister chenna in pawh a tel a ni.