BJP hi kum 10 chhungin khawvela party hausa ber an ni hman : Priyanka Gandhi

Congress party hruaitu, Priyanka Gandhi Vadra chuan Dhubri, Assam-a election rally neih chu telpuiin, Assam leh sorkar laipuia rorel lai, Bharatiya Janata Party (BJP) chu sorkarna an chan chhungin an hausa chak hle tih a sawi.

Priyanka chuan BJP chu kum 10 chhungin khawvela party hausa ber an nih hman thu sawiin, Congress chuan kum 70 chuang rorel mah se, BJP angin an hausak phah ve lo niin a sawi. Assam-a BJP kaihhruai sorkar pawh Priyanka hian bei chhunzawmin, misual rual lalna ram (mafia raj) siamah a puh. Priyanka hian Assam chief minister Himanta Biswa Sarma chu pawikhawihna lian tham tak taka inhnamhnawihna neia a puh bakah Nadruddin Ajmal, All India United Democratic Front (AIUDF) nen a ruka thawk dunah a puh bawk.

Congress hruaitu hian prime minister Narendra Modi chu hur sualna thubuai awrh mek, Karnataka MP Prajwal Revanna a thlawp avangin na takin a sawisel tel bawk a ni. BJP chuan electoral bond an chhawr hle tih sawiin kum 10 chhungin khawvela party hausa ber nihna an neih theih phah a ni, a ti. PM chu mi nawlpui harsatna hrethiam loah puhin, Assam chhunga hnathawh tur nei lo tam lutuk chu manganthlak a tih thu a sawi a, Assam CM leh a cabinet minister-te chu mi nawlpui harsatna sutkian tum loa mimal hamṭhatna chauh ngaihtuahah a puh bawk a ni.